Արամ Սարգսյան. «Ինձ համար տխուր է, որ կրտսեր եղբայրս չի կիսում իմ քաղաքական մոտեցումները». մամուլ
«Առավոտ» օրաթերթը գրում է. «Այն, որ Վազգեն Սարգսյանի փոքր եղբայրը՝ Արմեն Սարգսյանը, անցած նախագահական ընտրություններում հրապարակայնորեն սատարեց ՀՀԿ-ի թեկնածու Սերժ Սարգսյանի թեկնածությունը, միանշանակ չընկալվեց: Մանավանդ, որ Սարգսյանների մյուս եղբայրը՝ «Հանրապետություն» կուսակցության նախագահ Արամ Սարգսյանը, արմատական ընդդիմադիր դիրքերից է հանդես գալիս, իսկ իր վերջին հարցազրույցներից մեկում էլ կարծիք էր հայտնել, որ սա ոչ թե ընտրություն է, այլ տուն-տունիկ:
Երեկ Եռաբլուրում՝ Վազգեն Սարգսյանի ծննդյան 54-րդ տարեդարձի օրը, Aravot.am-ը Արամ Սարգսյանից հետաքրքրվեց՝ ինչպե՞ս է վերաբերվում ինքը Արմեն Սարգսյանի դիրքորոշմանը:
«Ես շատ կցանկանայի այդ հարցը տալ Վազգենին: Չգիտեմ՝ Վազգենն ինչ կպատասխաներ այդ հարցին: Շատ քիչ հարցեր կան, որոնց պատասխանը չգիտեմ, թե ինչ կասեր Վազգենը: Դժբախտաբար, մեր բարեկամները, հարազատները միշտ չեն այնպիսին, ինչպիսին մենք ենք ուզում իրենց տեսնել: Ես առաջինը չեմ, վերջինը չեմ. աշխարհի պատմությունը լիքն է նման օրինակներով՝ սկսած Աստվածաշնչից: Դա էդպես է, փաստ է, որ էդպես է: Չգիտեմ,- ասաց Արամ Սարգսյանը՝ հավելելով,- ինձ համար տխուր է, որ էդպես է, որ իմ կրտսեր եղբայրը չի կիսում իմ քաղաքական մոտեցումները»:
Հետաքրքրվեցինք՝ Արամ և Արմեն Սարգսյանները զրույց ունեցե՞լ են այդ առիթով: «Իհարկե, իմ տեսակետները ներկայացրել եմ, բայց Արմենը դեռ այն ժամանակ՝ 2003 թվականի դեպքերից հետո էլ հարցազրույց տվեց և իր մոտեցումներն ասաց, 2008-ին էլ իր մոտեցումներն ասաց: Այնպես որ, այստեղ նորություն չկա: Ուղղակի ամեն անգամ նման տեսակետներ ասելուց հետո հասարակությունը նորից զարմանում է՝ թե ինչո՞ւ է էդպես: Ես չեմ զարմանում»,- ասաց Արամ Սարգսյանը»:
