ԲՀԿ-ում ձախ ձեռքը չգիտի, թե ինչ է անում աջը. մամուլ
«ԲՀԿ-ում ոչ մի կերպ չեն կողմնորոշվում, թե երբ պետք է հանդես գան կուսակցական անդամներին ուղղված ազատ քվեարկության կոչով, և արդյո՞ք հանդես գան, թե՞ ոչ։ Այնտեղ անորոշություն է, և ձախ ձեռքը չգիտի, թե ինչ է անում աջը։ Քաղխորհրդի վերջին նիստը, ըստ ԲՀԿ հավաստման, տեղի է ունեցել դեկտեմբերի 12-ին, որտեղ հրապարակվել է Ծառուկյանի հայտնի հայտարարությունը, դրանից հետո, ըստ Ծառուկյանի մամլո խոսնակ Իվետա Տոնոյանի, իրենք քաղխորհրդի նիստ չեն արել»,- գրում է «Հրապարակ» օրաթերթն ու հավելում.
Մեր այն հարցին, թե ԲՀԿ քաղխորհրդի բազմաթիվ անդամներ պնդում են, որ տևակաև ժամանակ է, ինչ ԲՀԿ քաղխորհրդի նիստ տեղի չի ունենում, և որ այդ օրը ևս՝ դեկտեմբերի 12-ին, քաղխորհրդի նիստ տեղի չի ունեցել, իրենք չեն մասնակցել և հայտարարության մասին իմացել են մամուլից, Իվետա Տոնոյանը հակադարձեց. «Բնականաբար, այդպես չէ. նիստ եղել է»։ Իսկ ճի՞շտ են տեղեկությունները, թե Գագիկ Ծառուկյանը ևս պաշտպանելու է Սերժ Սարգսյանին, և որ Կոտայքի մարզի պատասխանատուն ինքն է, իսկ Կարապետ Գուլոյանն էլ Աբովյան քաղաքի պատասխանատուն է։ «Գագիկ Ծառուկյանի մասով Ձեր դիտարկումը դասական ապատեղեկատվություն է»,– ասաց մամլո խոսնակը։
