Ես սատարում եմ Արման Սահակյանին. Սամվել Բալասանյան
Մի քանի օր առաջ galatv.am-ին հայտնի դարձավ, որ Գյումրու քաղաքապետ ԲՀԿ-ական Սամվել Բալասանյանը դեկտեմբերի 2-ին տեղի ունենալիք պատգամավորի ընտրությունների ժամանակ սատարելու է թիվ 35 ընտրատարածքում առաջադրված պատգամավորի թեկնածու, ՀՀԿ-ական Արման Սահակյանին: Ս. Բալասանյանի մամլո խոսնակ Զոհրապ Եգանյանը լրատվամիջոցների հետ զրույցում մեկնաբանել է, թե ինչու է ԲՀԿ-ական Բալասանյանը որոշել ՀՀԿ թեկնածուին ստարել, սակայն ինքը՝ Սամվել Բալասանյանը, խուսափում էր բացատրել, թե որն է պատճառը, որ ՀԱԿ-ԲՀԿ նման հարաբերությունների փուլում ինքը որոշեց սատարել ՀՀԿ-ական թեկնածուին, այն դեպքում, երբ նույն ընտրատարածքում թեկնածու ունի նաև ՀԱԿ-ը՝ ի դեմս Մուրադ Գրիգորյանի:
Այսօր galatv.am-ի թղթակիցը այդ հարցի պատասխանը ճշտել է Գյումրու քաղաքապետ Ս. Բալասանյանից, ով մասնակցում էր Գյումրիում Ուկրաինայի պատվո հյուպատոսարանի բացման հանդիսավոր արարողությանը:
«Ես իմ խոսքը ասել եմ, և դա շատ կարևոր է ինձ համար, որովհետև նա (նկատի ունի Արման Սահակյանին) շարունակելու է այն ծրագրերը, որոնք ես արդեն իսկ փոխանցել եմ իրեն: Դա 16 համայնքների հետ կապված ծրագրեր են, և Գյումրու հետ կապված ծրագրերը նա՝ Արման Սահակյանը, խոստացել է, որ անպայման կկատարի, որովհետեւ աշխատատեղեր է պետք ստեղծել եւ ես կարեւորում եմ, որպեսզի բոլորս ակտիվ մասնակցություն ունենանք եւ մեր ձայնը տանք Արման Սահակյանին»,-ասաց Սամվել Բալասանյանը:
Հարցին՝ «իսկ կուսակցության հետ քննարկեցի՞ք, որ…», Ս. Բալասանյանը ընդմիջել է եւ արագորեն պատասխանել է. «Էդ էլ դուք հստակեցրեք կուսակցության հետ»:
