Տավուշի մարզում ևս հայտնաբերվել է սիբիրյան խոց
Տավուշի մարզում վերջին օրերին սատկած խոշոր եղջերավոր անասուններից մեկի մոտ հայտնաբերվել է սիբիրյան խոց: Ինչպես հայտնում է NEWS.am-ի Տավուշի թղթակիցը, հոկտեմբերի 30-ին մարզի Իջեւան քաղաքից 7կմ հեռավորության վրա գտնվող հանդամասում խոշոր եղջերավոր անասուն է սատկել, որից վերցված ներքին օրգաններն ուղարկվել էին փորձագիտական լաբորատորիա, և այսօր արդեն հաստատվել է, որ կենդանու մոտ առկա է եղել սիբիրյան հիվանդություն, իսկ կենդանին պատվաստված չի եղել նշված հիվանդության դեմ:
NEWS.am-ի Տավուշի թղթակցի հետ զրույցում սնդի անվտանգության պետական տեսչության Տավուշի մարզային կենտրոնի պետ Վասիլ Գալստյանն ասել է, թե մարզում մինչ օրս անկվել է երկու խոշոր եղջերավոր անասուն: «Առաջին դեպքը գրանցվեց հոկտեմբերի 30-ին, անմիջապես մեկնել ենք դեպքի վայր, սատկած կենդանու մսից և ներքին օրգաններից փորձանմուշներ ենք վերցրել և ուղարկել փորձաքննության»,- ասել է նա` հավելելով, որ անկված կենդանու միսն ու ներքին օրգանները ոչնչացվել են այրման եղանակով. «Նշված կենդանին վակցինացված չի եղել սիբիրախտի դեմ»:
Հաջորդ դեպքը գրանցվել է նոյեմբերի 3-ին, որի ժամանակ սատկել է մեկ գոմեշ, սակայն նշված կենդանուց վերձված փորձանմուշների պատասխանները դեռեւս չեն ստացվել: Վասիլ Գալստյանի փոխանցմամբ` դեպքից անմիջապես հետո մարզ են այցելել բոլոր պատկան մարմինները, նրանց հանձնարարությամբ կատարվել է կենդանիների վերահաշվարկ և ռևակցինացում:
Նշենք, որ Իջևան քաղաքում տեղադրվել է հսկիչ անցագրային կետ, որտեղ ոստիկանության հետ համատեղ վերահսկում են կենդանիների մսի տեղաշարժը:
Լուսանկարը ՝ Էդվարդ Արզումանյանի /NEWS.am
