Չեզարե Պրանդելի. Ուժեղ հակամարտություն ենք սպասում

«Հրազդան» մարզադաշտի մամուլի սրահում կայացավ Իտալիայի հավաքականի գլխավոր մարզիչ Չեզարե Պրանդելիի մամուլի ասուլիսը, որը նվիրված էր Աշխարհի առաջնության ընտրական փուլի B խմբի 3-րդ տուրի Հայաստան – Իտալիա հանդիպմանը:

-Ինչպիսի՞ Իտալիա պետք է ակնկալել այսօր:

-Պետք է բարձրակարգ ֆուտբոլ ցուցադրել, քանի որ Հայաստանի հավաքականը բացի տեխնիկապես ուժեղ լինելուց, շատ արագ է: Պետք է լավագույն խաղը ցուցադրենք:

-Ի՞նչ եք ասել Բալոտելիին:

-Խոսել ենք շատ բաների մասին, թե որ դիրքում ընդունի գնդակը, ինչ տարածության վրա խաղա: Խոսել ենք միայն խաղի կառուցվածքի մասին, ուրիշ ոչնչի: Շատ ուշադրություն ենք դարձրել մարզումներին և ոչ միայն Բալոտելին, այլև ամբողջ թիմը պետք է իր լավագույն խաղը ցույց տա:

-Ի՞նչ կարծիքի եք Հայաստանի հավաքականի մասին:

-Թիմը մեծ զարգացում է ապրում, շատ լավ է խաղում հարձակման գծում: Ժամանակակից թիմ է, որն ունակ է տեմպն ավելացնել խաղի ընթացքում:

-Ինչ մարտավարություն եք ընտրել:

-Ուզում եմ սպասել մինչև վերջին րոպեն, դրանից հետո նոր կորոշենք թե ինչ մարտավարությամբ հանդես կգանք:

-Ի՞նչ խաղ եք ակնկալում:

-Ակնկալում եմ մի խաղ, որ չի եղել նախորդ երկու հանդիպումներում, ավելացնել տեմպն ու լավ որակի ֆուտբոլ խաղալ:

-Խաղից առաջ խոսակցություններ էին պտտվում, որ Պրանդելին ավելի շատ նախապատվություն է տալիս «Յուվենտուսի» խաղացողներին…

-Ֆուտբոլի ժամանակ չարժե խոսել նման թեմաների շուրջ: Մենք աշխատում ենք մարզիչների հետ, քննարկում, հետո նոր որոշում կայացնում: Ֆուտբոլիստներն այժմ պետք է հանգստանան երկու օր, որպեսզի կարողանան ողջ ուժերով հանդես գալ:

-Հայաստանի հավաքականի մասնակցությամբ ի՞նչ խաղեր եք դիտել:

-Դիտել ենք վերջին չորս խաղերի տեսագրությունները: Նկատել ենք, որ շատ հետաքրքիր թիմ է, որը լավ պաշտպանողական մարտավարություն ունի ու շատ արագ ֆուտբոլ է խաղում:

-Ո՞ւմ կառանձնացնեք հայերից:

-Ես միշտ ընդգծել եմ հարձակման գիծը, առջևի 4 խաղացողները կարող են բարձրակարգ ֆուտբոլիստներ համարվել:

-Իտալիայի ներկայիս կազմի մասին ի՞նչ կասեք:

-Մենք տեղ ենք տալիս թե՛ փորձառու, թե՛ երիտասարդ խաղացողներին, ովքեր մարզվում են հինգ հնաբնակների կողքին ու շատ բան կարող են սովորել: Խաղն այնպես կկառուցենք, որն ավելի վստահություն կհաղորդի մեր ֆուտբոլիստներին:

-Դժվա՞ր խաղ եք ակնկալում վաղը:

-Վաղը մեզ շատ դժվար խաղ է սպասվում: Երկու թիմերն էլ շատ են ցանկանում հաղթել: Սպասենք և տեսնենք, թե ինչ կլինի, բարդ խաղ ենք ակնկալում: Մենք պետք է փորձենք յուրաքանչյուր գնդակը ճիշտ օգտագործել: Թիմը բավականին քրտնաջան է աշխատում մարզումների ժամանակ:

-Չե՞ք անհանգստանում որ թիմը կարող է վատ հանդես գալ:

-Չեմ անհագստանում, սակայն դա չի նշանակում, որ կարող ենք թերագնահատել մրցակցին: Մենք ուսումնասիրել ենք Հայաստանի խաղը ու ուժեղ հակամարտություն ենք սպասում:

-Բալոտելին կցանկանա՞ դառնալ իսկական հերոս ու ընկալի Իտալիայի հավաքականը որպես իր ամենալավ թիմը:

-Բալոտելին շատ լավ է մարզվել, ու երևում է առաջ գնալու նրա ցանկությունը:

Մարզական լրահոսն ապահովում է SportArmenia.com-ը