Ռուսաստանցիները չեն վստահում Պուտինին
Ռուսաստանի նախագահ Վլադիմիր Պուտինի վարկանիշը կտրուկ անկում է ապրել այն բանից հետո, երբ նա վերադարձել է Կրեմլ:
Ռուսական հեղինակավոր «Լևադա» կենտրոնի կողմից օգոստոսի 10-13-ը անցկացված հարցումների արդյունքում առաջին անգամ Պուտինի գործունեությունը բացասաբար է գնահատել ռուսաստանցիների 46 տոկոսը, իսկ հարցվածների 25 տոկոսը խիստ բացասական գնահատական է տվել: Նրա գործունեությունից գոհ է ռուսաստանցիների 48 տոկոսը միայն:Այն դեպքում, երբ ընդամենը երկու-երեք ամիս առաջ` մայիսին Պուտինի գործունեությունը դրական էր գնահատում բնակչության 60 տոկոսը, իսկ խիստ բացասական էր արտահայտվում միայն 21 տոկոսը:
Ռուս փորձագետները հիշեցնում են, որ Պուտինի վարկանիշը 60 տոկոսից նվազել էր միայն 2005 թվականին: Պուտինի նախագահության առաջին երկու ժամկետներին նրա վարկանիշը պահպանվում էր 65 տոկոսի սահմաններում, իսկ 2008 թվականին` կապված ռուս-վրացական պատերազմի հետ, հասել էր մինչև 80 տոկոսի:
«Լևադա» կենտրոնի հարցման արդյունքներով, ներկայումս ռուսաստանցիների ընդամենը 57 տոկոսն է վստահում Վլադիմիր Պուտինին` որպես առաջնորդի: Որպես երկրի նախագահ Պուտինին վստահում է բնակչության միայն 10 տոկոսը, իսկ 30 տոկոսն ընհանրապես չի վստահում նրան այդ պաշտոնում: Այն դեպքում, երբ այս տարվա հունվարին Պուտինին վստահում էր ռուսաստանցիների 63 տոկոսը: Պուտինի վարկանիշի նման աննախադեպ անկումը փորձագետները բացատրում են մի քանի հանգամանքնեորվ:
Նախ, շատերի համոզմամբ, անցած տարիների ընթացքում մարդիկ հոգնել են միևնույն դեմքից: Բացի այդ, ռուսաստանցիները հոգնել են սպասել փոփոխությունների, որոնք անընհատ խոստանում է Պուտինը, սակայն դրանք այդպես էլ իրականություն չեն դառնում: «Լևադա» կենտրոնի տնօրեն Լև Գուդկովը համոզմունք է հայտնել, որ Պուտինը այլևս երբեք չի ունենա նախկին վստահությունը:
Գուդկովի կարծիքով, օրեցօր ավելանում է այն ռուսաստանցիների թիվը, ովքեր համակրում են Պուտինի ռեժիմի դեմ պայքարի դուրս եկած ակտիվիստներին, պարզապես շատերը դեռ վախենում են միանալ նրանց:
