Հայնց Ֆիշեր. Ռազմական լուծումն անթույլատրելի է
«ԵԱՀԿ Մինսկի խումբը կարող է հասնել ղարաբաղյան հակամարտության խաղաղ կարգավորման»,- այսօր Հայաստանի նախագահի հետ համատեղ մամլո ասուլիսում հայտարարել է Ավստրիայի նախագահ Հայնց Ֆիշերը: Ավստրիայի նախագահը Երևանում է՝ պաշտոնական այցով: Նա նաև նշել է, որ ծանոթ է հարցի կարգավորման ոչ միայն ադրբեջանական, այլ նաև թուքական դիրքորոշմանը: Այս համատեքստում Ավստրիայի նախագահը կարևորել է հակամարտության գոտու ճակատային հատվածներից դիպուկահարներին հետ քաշելու անհրաժեշտությունը: «Մենք վստահ ենք, որ ԱՄՆ-ը, Ռուսաստանն ու Ֆրանսիան ունեն համապատասխան ներուժ, սակայն խնդրի վերջնական կարգավորման համար ահռելի համբերատարություն է անհրաժեշտ»,-ասել է նա: Ֆիշերը հակամարտությունը բավականին բարդ է որակել ու նշել է, որ դրա ռազմական ճանապարհով լուծումն անընդունելի է:
