Եթե մինչև ՔՊ-ականների իշխանության գալը յուրաքանչյուր քաղաքացուն ընկնող պետական պարտքը նույնիսկ 2.2 հազար դոլարից պակաս էր, հիմա հասել է ընդհուպ 4.7 հազար դոլարի՝ 2.5 հազարով ավելացել է։
Հայաստանի այսօրվա ՔՊ-ականների իշխանությունը՝ վերից վար, անպատասխանատուների համախումբ է։ Մի ադեկվատ մարդ չկա մեջները։ Ոչ մեկն իրեն հաշիվ չի տալիս իր արածների ու ասածների համար։ Իրենց քաղաքական ամբիցիաները բավարարելու համար պատրաստ են ցանկացած պահի զոհասեղանին դնել երկրի ու ժողովրդի ճակատագիր։
ՔՊ-ականների իշխանությունը հերթական հակառեկորդն է գրանցել. Հրապարակված վերջին տվյալներով, կառավարության բաժին պարտքի միայն տոկոսները փակելու համար, անցած տարվա 10 ամսում, տարադրամով արտահայտած, ավելի քան 856 մլն դոլար են վճարել։ Այդքան գումար քաղաքացիների բերանից կտրել են, որպեսզի փակեն պարտքերի այն հսկայական տոկոսները, որոնք ձևավորվել են հատկապես վերջին տարիներին՝ պարտքերն ագահորեն ավելացնելու հետևանքով։
Նիկոլ Փաշինյանի իշխանության տարիներին ապառիկով ապրելը Հայաստանում դարձել է օրինաչափություն։ Ոչ միայն պետությունն է ապառիկով գոյատևում, այլև հասարակությունը։ Իշխանությունը պարտքեր է վերցնում՝ պարտքերով պետական բյուջեի ծախսերը կատարելու ու գործ անելու իմիտացիա ստեղծելու համար, քաղաքացիները վարկեր են վերցնում՝ վարկերով իրենց կենցաղային կարիքները հոգալու համար։
Պատրանքներով հասարակությանը կերակրող ՔՊ-ականների իշխանությունը Հայաստանը հասցրել է աղետի։ Նախկիններին էին մեղադրում երկիրը դատարկելու, սահմանամերձ բնակավայրերը անպաշտպան թողնելու, արտագաղթը խթանելու, ժողովրդագրական պատկերն աղճատելու մեջ։
Իշխանության գալուց հետո հեղափոխականները հասցրել են պետական պարտքն ավելացնել 6 մլրդ 827 մլն դոլարով։ Կառավարության պարտքն այդ ընթացքում նույնիսկ ավելի շատ է աճել՝ 6 մլրդ 913 մլն դոլարով։
