Ինչպես 50 տարեկանում 20 տարեկանի տեսք ունենալ. պատմում է Լոնդոնից հայտնի սննդաբան Նատաշա Քորրեթը

Գաղտնիք չէ, որ մեր արտաքինը կախված է մեր օգտագործած սննդամթերքից: Այն, ինչ ստամոքս է ընկնում, անպայման կարտացոլվի ամենաանհարմար տեղերում: Եվ դա միայն տորթերին ու գազավորված ըմպելիքին չի վերաբերում: Անցանկալի մթերքների ցանկում հայտնվեցին նաև միսը, ձուն, սուրճն ու պանիրը:

Հիմնային սնունդ

Հոլիվուդյան գեղեցկուհիներ Վիկտորյա Բեքհեմը, Ջենիֆեր Էնիսթոնը և հիսնամյա Էլ Մաքֆերսոնը հիմնային սնունդը քարոզում են՝ որպես օգտակարության ու գեղեցկության տեսանկյունից կատարյալ տարբերակ: Դրա հիմնական սկզբունքը մեծ քանակությամբ հիմնային սննդատեսակներ օգտագործելն է, քանի որ այն խոչընդոտում է օրգանիզմում թթուների կուտակմանը, ինչն էլ բորբոքումների, ճարպակալման և ծերության պատճառն է: Վիկտորյա Բեքհեմի սննդակարգը կազմվել է լոնդոնյան հայտնի շեֆ խոհարար և սննդաբան Նատաշա Քորրեթի և բժիշկ Վիքի Էդսոնի կողմից:

Տեսություն

Ինչպես հայտնի է, օրգանիզմում թթվահիմնային հավասարակշռությունը (pH) ուղիղ կերպով ազդում է նյութափոխանակության վրա: Նորմայի մեջ ստամոքսում գերակշռում է թթվային միջավայրը սննդի լավ մարսողության համար: Առավելագույն թթվայնության ցուցանիշը 1 pH է, չեզոքության կամ թթվի ու հիմքի հավասարակշռությունը՝ 7 pH, առավելագույն հիմնային միջավայրը 14 pH է: Արյան մեջ pH-ի մակարդակը պետք է պահպանվի 7.35-7.45-ի միջև:

Մարդու օրգանիզմի համար pH-ի նորմալ մակարդակը կենսական անհրաժեշտություն է: Դա պայմանավորված է նրանով, որ բջջի հիմք հանդիսացող սպիտակուցը պարտավոր է խստագույնս պահպանել որոշ երկրաչափական ձևեր ճիշտ կենսագործունեություն ծավալելու համար, իսկ սպիտակուցի եռաչափ ձևերը շատ ուժեղ կախվածություն ունեն pH-ի անգամ ոչ մեծ փոփոխությունից: Եթե արյան մեջ թթվայնության մակարդակը բարձր է, խախտվում են նյութափոխանակության բոլոր պրոցեսները:

Սնունդը վատ է յուրացվում, ի հայտ է գալիս վիտամինային և միկրոէլեմենտների դեֆիցիտի խնդիր, օրգանիզմը չի կարողանում քայքայել ճարպերը, և դրանք կուտակվում են անոթների պատերին և օրգանիզմում: Որպես հետևանք՝ ընկնում է դիմադրողականությունը, վատանում է մազերի և մաշկի վիճակը: Եթե դրա վրա ուշադրություն չդարձնես և ոչինչ չանես, մաշկը դառնում է խամրած ու թորշոմած, կարող է ցան առաջանալ և, որ ավելի վատ է, էկզեմա կամ փսորիազ: Սննդաբան Նատաշա Քորրեթը պնդում է, որ հիմնային սննդին հետևելը դիետա չէ, այլ առողջ սննդակարգ, որը պաշտպանում է օրգանիզմը:

Որպես պարգև՝ դու կստանաս փայլուն մազեր, մաքուր մաշկ և գեղեցիկ կազմվածք: Պարադոքսն այն է, որ մեր կերած մթերքների մեծ մասը թթվայնություն ստեղծող են: Շտապելու սովորությունը, ամեն ինչ վազքով անելը, ֆիզիկական ծանրաբեռնվածությունը բարձրացնում են թթվայնության մակարդակը: Եթե դու ակտիվորեն նիհարում ես, արյան մեջ առաջանում են բազմաթիվ թույներ, իսկ հիմնային սննդամթերքը նպաստում է դրանց՝ օրգանիզմից դուրս բերելուն: Այստեղից՝ հետևություն: Լավ արդյունքի միայն սպորտի ու ֆիզիկական վարժությունների միջոցով հասնել հնարավոր չէ:

Ճիշտ սննդակարգը գեղեցիկ կազմվածք ունենալու հաջողության 80%-ն է: Մեր ընդունած կերակուրը բաղկացած է 3 խմբի մթերքներից՝ սպիտակուցներ, բուսական ծագման սննդամթերք, ածխաջրածիններ: Սպիտակուց պարունակող սննդամթերքների թվին է պատկանում միսը, ձուն, ձուկը, սունկը, սմբուկը, հատիկեղենը, ընկուզեղենը, արևածաղկի սերմերը: Բուսական ծագման սննդամթերքներից են չրերը, մրգերը, բացի կարտոֆիլից՝ բոլոր բաջարեղենները, թարմ քամված հյութերը, հատապտուղները, հնդկաձավարը, յուղերն ու ճարպերը:

Ածխաջրածին են պարունակում ալյուրով պատրաստված սննդատեսակները, հացը, շաքարը, կոնֆետեղենը, մուրաբաները, թեյը, ձավարեղենը, կարտոֆիլը, մեղրը: Ընդ որում, սպիտակուցներն ու աշխաջրածիններն իրար հետ անհամատեղելի են:

Հիմնային սննդակարգի սկզբունքը

Եթե դու լրջորեն որոշել ես փոխել քո սննդակարգը, պետք է շատ ջանք գործադրես: Քո սննդակարգը պետք է 70%-ով բաղկացած լինի հիմնային մթերքներից և միայն 30 %-ով՝ թթվայինից: Արդեն մեկ շաբաթ հետո արդյունքն ակնհայտ կլինի: Չմոռանաս ցանկացած սննդակարգի ոսկե կանոնի մասին՝ 50% ածխաջրածին, 25% սպիտակուցներ, 25% ճարպեր:

Ստորև ներկայացնում ենք թթվայնություն առաջացնող մթերքների ցանկը, որի գործածությունը պետք է սահմանափակել: Հիմնային մրգերն են խնձորը, բանանը, մոշը, խուրման,արքայախնձորն ու նարինջը: Հիմնային բանջարեղեններից են բրոկոլին, կաղամբը, գազարը, ծաղկակաղամբը, նեխուրը, սմբուկը, սունկը, ճակնդեղը, դդումը: Թթվային միջավայր են ստեղծում միսը, պանիրը, ոլոռը, հացահատիկը, ընկուզեղենը: Քո սեղանի գլխավոր ճաշատեսակները պետք է բանջարեղենային լինեն:

Մրգերը պետք է միայն շաքարի ցածր պարունակությամբ լինեն, օրինակ՝ կիտրոն, լայմ, գրեյպրուտ, ավոկադո և հատապտուղներ: Որպես թթվային մթերքներ՝ կարող են ծառայել ամբողջահատիկ հացը, ընկուզեղենը, սերմերը, որոշ մրգեր, ինչպես նաև՝ ոչխարի կամ այծի կաթը: եթե դժվարանում եք ամբողջությամբ հրաժարվել մսից, խոզի միսն ու կարմիր միսը փոխարինեք հավի մսով: Փոխանակության պրոցեսներն արագացնելու համար անհրաժեշտ է շատ հիմնային ջուր խմել:

Դրա համար պետք է օգտագործել հատուկ ֆիլտր կամ կես լիտր մաքուր ջրին կես կիտրոնի հյութ ավելացնել: Ալկոհոլը շատ ուժեղ թթվային միջավայր է ստեղծում օրգանիզմում: Եթե ուզում ես նիհարել ու քաշդ պահպանել, ցանկալի է դրանից հրաժարվել ընդհանրապես, այլ ոչ թե՝ միայն դիետայի ընթացքում:

Հիմնական կանոնները

Մի հիմնվիր մթերքի համի վրա: Թթու կիտրոնը, ցիտրուսայիններն ընդհանրապես, չնայած իրենց թթու համին, պատկանում են հիմնային մթերքների խմբին: Դրանք կարելի է համարձակորեն օգտագործել: Ընտրիր ճարպի ցածր պարունակությամբ մսամթերք: Հավի փափկամիսը կամ հնդկահավը պատրաստիր առանց մաշկի: Կաթնամթերքը փոխարինիր սոյայով: Մի ոգևորվիր ձավարեղենով. շիլաներ օգտագործիր շաբաթվա ընթացքում առավելագույնը 2- 3 անգամ: Բացառիր սուրճը, շատ կիտրոնաջուր խմիր և խոտաբույսերով թեյ: Մոռացիր շաքարի և շաքար պարունակող բոլոր մթերքների մասին: Աղի քանակությունը մինիմալի հասցրու: Արգելված են նաև համի ուժեղացուցիչներ պարունակող համեմունքները, խմորիչը, օսլան:

Հիմնային սննդակարգը բաղկացած է 3 փուլերից, որոնք տեղերով փոխել չի կարելի: Յուրաքանչյուրի տևողությունը մեկ շաբաթ է: Առաջին փուլի հիմքում թարմ, ջերմային մշակման չենթարկված բանջարեղենն ու մրգերն են, հատապտուղներն ու կանաչեղենը: Թույլատրվում է դրանք շոգեխաշել կամ եփել ջեռոցում, իսկ ածխաջրածինները, ճարպերն ու սպիտակուցները պետք է լինեն մթերքների չեզոք խմբից և կազմեն սննդակարգի 20%-ը: Երկրորդ փուլի ժամանակ սննդի մեջ ավելանում են հյութերը և թարմ հատապտղային կամ բանջարեղենային սմուզիները: Վերջին շաբաթվա ընթացքում կարելի է օգտագործել ձավարեղեն: Դա կարող է լինել օրական մի բաժին շիլա կամ 2 կտոր առանց խմորիչի, ամբողջահատիկ հաց: Ցանկալի է սննդակարգն ուղեկցել ֆիզիկական ծանրաբեռնվածությամբ, օրինակ՝ օրական կես ժամից ավելի քայլել կամ լողալ, վազել:

Իմացիր չափը

Կտրուկ անցում մի կատարիր հիմնային սննդակարգին՝ իսպառ բացառելով թթվային մթերքները: Անցումը կատարիր աստիճանաբար: Այդպիսի սննդակարգի ժամանակ ավելորդ խստությունը հանգեցնում է օրգանիզմի գերհիմնայնացմանը և կարող է ունենալ վտանգավոր հետևանքներ: Ատրոֆիկ գաստրիտով և ստամոքսի ցածր սեկրետորային ֆունկցիա ունեցող մարդիկ պետք է ձեռնպահ մնան այս սննդակարգին հետևելուց: Արգելվում է նաև սիրտ-անոթային հիվանդություններով տառապող մարդկանց: Փորձիր սնունդդ փոխել 3 շաբաթով, ապա ավելացրու թթվային մթերքների քանակը՝ օրգանիզմը կարևոր նյութերից չզրկելու համար: Եթե փոփոխություների ցանկությունը շատ մեծ է, փորձիր սննդակարգդ փոխել այնպես, որ այն օգտակար լինի և միևնույն ժամանակ՝ համեղ: Հիմնային և թթվային մթերքները պետք է անհատական հավասարակշռություն ունենան: Մի կենտրոնացիր քայքայիչ դիետաների վրա, միշտ սահմանափակումներին մտածված մոտեցիր և մի մոռացիր ֆիզիկական ակտիվության մասին:

Նյութը հրապարակման պատրաստեց Սոֆա Պետրոսյանը