Հարուցվել է 13 քրեական գործ․ պետությանը պատճառված վնասը կազմել է 567.205.483 դրամ
ՀՀ գլխավոր դատախազության միայն պետական շահերի պաշտպանության վարչության կողմից 2017թ. ընթացքում պետական կառավարման տարբեր ոլորտներում պետական շահերի պաշտպանության վիճակի վերաբերյալ իրականացվել է 62 ուսումնասիրություն: Դրանց արդյունքներով՝ պետական մարմինների, վերջիններիս առանձին ստորաբաժանումների գործառույթների իրականացման կարգի պահպանման, պետական միջոցների ստացման, պահպանման և արդյունավետ օգտագործման, պետությանը պատճառված վնասների վերականգման աշխատանքներում արձանագրված բազմաթիվ խախտումների, թերացումների և բացթողումների վերաբերյալ համապատասխան պետական մարմինների ղեկավարներին հաշվետու տարում ներկայացվել է 62 հաղորդում։
Դրանց քննարկման արդյունքներով պետական մարմինների ղեկավարները համապատասխան փոփոխություններ և լրացումներ են կատարել իրենց ստորաբաժանումների գործունեության կարգերում, իսկ դրանց բացակայության դեպքում՝ սահմանել նոր կանոնակարգեր, հարուցվել են մի շարք կարգապահական վարույթներ, որոնց արդյունքներով մի շարք պետական ծառայողներ ենթարկվել են պատասխանատվության, պետության վնասների վերականգնման նպատակով տրվել են նախազգուշացումներ, հարուցվել հայցեր, դատական ակտերի դեմ բերվել են վերաքննիչ և վճռաբեկ բողոքներ։
Վարչության դատախազների կողմից հաշվետու տարում հարուցվել է պետական շահերի պաշտպանության 9 հայց՝ ընդհանուր 336.918.045 դրամ հայցապահանջով: Ուսումնասիրությունների ընթացքում վնասը կամովին վերականգնելու մասին կատարվել է 3 նախազգուշացում, կամովին վերականգնվել է 15.896.820 դրամ:
Բացի այդ, հայտնաբերված մի շարք խախտումների կապակցությամբ հարուցվել է 13 քրեական գործ, որոնցով պետությանը պատճառված ընդհանուր վնասը կազմել է 567.205.483 դրամ: Այս քրեական գործերի նախաքննության ընթացքում վերականգնվել է 14.436.694 դրամ:
Մասնավորապես.
Սոցիալական ապահովության ոլորտ
Պաշտոնեական լիազորությունները չարաշահելու, պաշտոնական փաստաթղթեր կեղծելու, առանձնապես խոշոր չափերով յուրացումներ կատարելու առերևույթ հանցագործությունների հատկանիշներով 3 քրեական գործեր են հարուցվել ՀՀ աշխատանքի և սոցիալական հարցերի նախարարությունում, Զբաղվածության պետական գործակալությունում և «Երևանի թիվ 1 տուն ինտերնատ» ՊՈԱԿ-ում /տարեցների տուն ինտերնատ/ իրականացված ուսումնասիրությունների արդյունքներով:
Բացի այդ, նախարարության աշխատակազմի ղեկավարին, պետական գործակալության պետին ուղարկվել են հաղորդումներ նրանց ենթակա մարմիններում, կազմակերպություններում և ստորաբաժանումներում արձանագրված խախտումների վերաբերյալ:
Կրթության և գիտության ոլորտ
Պատասխանատու պաշտոնատար անձանց և նյութական պատասխանատվություն կրող պաշտոնատար անձանց կողմից ծառայության նկատմամբ անբարեխիղճ կամ անփույթ վերաբերմունքի հետևանքով իրենց պարտականությունները չկատարելու, առանձնապես խոշոր չափերով յուրացումներ կատարելու առերևույթ հանցագործությունների հատկանիշներով 2 քրեական գործ է հարուցվել «Երևանի Վ.Բրյուսովի անվան պետական լեզվաբանական համալսարան» ՊՈԱԿ-ում իրականացված ուսումնասիրությունների արդյունքներով:
Բացի այդ, ՀՀ կրթության և գիտության նախարարության աշխատակազմի ղեկավարին ուղարկվել է հաղորդում նախարարության «Կրթական ծրագրերի կենտրոն» ծրագրերի իրականացման գրասենյակ» պետական հիմնարկում արձանագրված խախտումների վերաբերյալ:
Գյուղատնտեսության ոլորտ
Պաշտոնեական լիազորությունները չարաշահելու, առանձնապես խոշոր չափերով յուրացումներ կատարելու առերևույթ հանցագործությունների հատկանիշներով 1 քրեական գործ է հարուցվել «Հանրապետական անասնաբուժասանիտարական և բուսասանիտարական լաբորատոր ծառայությունների կենտրոն» ՊՈԱԿ-ի Գյումրու տարածքային կենտրոնում արձանագրված փաստերի կապակցությամբ:
Բացի այդ, ՀՀ գյուղատնտեսության նախարարության սննդամթերքի անվտանգության պետական ծառայության պետին ուղարկվել է հաղորդում՝ արձանագրված խախտումների և որպես սննդամթերքի անվտանգության բնագավառում քաղաքականություն մշակող և իրականացնող մարմին, շահագրգիռ գերատեսչությունների հետ ոլորտում պատշաճ հսկողական կառուցակարգեր սահմանելու հարցերը քննարկելու համար:
Պետական գույքի և ֆինանսների կառավարման ոլորտ
Պատասխանատու պաշտոնատար անձանց կողմից ծառայության նկատմամբ անբարեխիղճ կամ անփույթ վերաբերմունքի հետևանքով իրենց պարտականությունները չկատարելու, առանձնապես խոշոր չափերով հափշտակություններ կատարելու առերևույթ հանցագործությունների հատկանիշներով 3 քրեական գործ է հարուցվել ՀՀ ֆինանսների նախարարությունից, ՀՀ ԿԱ պետական գույքի կառավարման վարչությունից, ՀՀ էներգետիկ ենթակառուցվածքների և բնական պաշարների նախարարության Ջրային տնտեսության պետական կոմիտեից ստացված տվյալների, ինչպես նաև ֆիզիկական անձի դիմումի հիման վրա իրականացված ուսումնասիրություններով:
Հարկերի և պետական տուրքերի գանձման ոլորտ
2 քրեական գործ է հարուցվել հուղարկավորման ծառայություններ մատուցող սահմանափակ պատասխանատվությամբ ընկերության կողմից հարկերից խուսափելու և ՀՀ ԿԱ անշարժ գույքի կադաստրի պետական կոմիտեի պատասխանատու պաշտոնատար անձանց կողմից ծառայության նկատմամբ անբարեխիղճ կամ անփույթ վերաբերմունքի հետևանքով իրենց պարտականությունները չկատարելու, անշարժ գույքի հետ կապված հարկման ենթակա գործարքների վերաբերյալ տեղեկությունները ՀՀ ԿԱ պետական եկամուտների կոմիտեին չտրամադրելու փաստերի վերաբերյալ:
Կապի և տրանսպորտի ոլորտ
Առանձնապես խոշոր չափերով հափշտակություն կատարելու առերևույթ հանցագործության հատկանիշներով 1 քրեական գործ է հարուցվել «Հարավկովկասյան երկաթուղի» ՓԲԸ-ում արձանագրված երկաթուղային գծերի ապամոնտաժման և հափշտակության փաստերի կապակցությամբ:
Բնապահպանության ոլորտ
1 քրեական գործ է հարուցվել ՍՊ ընկերության կողմից իրականացվող աշխատանքների ընթացքում հողը հանելու, տեղափոխելու, պահպանելու և օգտագործելու կանոնները խախտելու հետևանքով շրջակա միջավայրին էական վնաս պատճառելու կապակցությամբ:
2017թ. ընթացքում քաղաքացիական դատավարության կարգով դատարան է հարուցվել 336.918.045 դրամ հայցապահանջով 9 հայց: Դատարանները քննել և դատական ակտեր են կայացրել 356.337.230 դրամի 14 հայցով, ներառյալ՝ նախորդ տարիներին հարուցված հայցերով: Դրանցից բավարարվել է 336.808.403 դրամի 11 հայցադիմում, 36 հայցի դատաքննություն դեռևս ընթացքի մեջ է:
Նախորդ ժամանակաշրջանում հարուցված հայցերով փաստացի վերականգնվել է շուրջ 20.000.000 դրամ:
2017թ. ընթացքում ՀՀ վերաքննիչ քաղաքացիական և ՀՀ Վճռաբեկ դատարաններ են ներկայացվել համապատասխանաբար՝ 6 վերաքննիչ և 5 վճռաբեկ բողոք: Վերաքննիչ բողոքներից 3-ը բավարարվել է, 1-ը մերժվել, 1-ը` վերադարձվել, իսկ 1-ը ընթացքի մեջ է: Վճռաբեկ բողոքներից 1-ը բավարարվել է, 1-ը մերժվել, 2-ը` վերադարձվել, իսկ 1-ը ընթացքի մեջ է:
Պետական շահերի պաշտպանության հարցադրումներով ուսումնասիրությունները շարունակվում են սոցիալական ապահովության, կրթության և գիտության, գյուղատնտեսության, ֆինանսների կառավարման, հարկերի և պետական տուրքերի գանձման, կապի և տրանսպորտի, Էներգետիկայի և բնական պաշարների, տնտեսական մրցակցության պաշտպանության, բնապահպանության, հողօգտագործման և այլ ոլորտներում:
