Անդրեյ Կառլովին սպանողը կթաղվի անանուն գերեզմանատանը
Թուրքիայում ՌԴ դեսպան Անդրեյ Կառլովին սպանող Մևլյութ Մերթ Ալթընթաշը, որի մարմինը դիահերձարանից հրաժարվել էին վերցնել ազգականները, կթաղվի անանուն գերեզմանատանը, հայտնում է Anadolu գործակալությունը։
Ավելի վաղ մարդասպանի մարմինը չվերցնելու ընտանիքի որոշման մասին հայտարարել էր նրա քույրը։ Համաձայն թուրքական օրենսդրության՝ հարազատները կարող էին մարմինը վերցնել 15 օրվա ընթացքում, սակայն մարմինն այնտեղ է արդեն 24 օր։
Գործակալության հաղորդմամբ՝ ներկայումս որոշվում են արարողակարգային հարցեր՝ կապված հուղարկավորության հետ։
Այն բանից հետո, երբ բոլոր հարցերը կկարգավորվեն, նրա մարմինը կհանձնվի տեղի իշխանություններին՝ անանուն գերեզմանատանը թաղելու նպատակով։
