«Մեծ պատիվ է, որ կուսակցությանն անդամագրվելուց անմիջապես հետո ստացա իմ վաղեմի գործընկերների վստահության քվեն». Վիգեն Սարգսյան
«Մեծ պատիվ է, որ կուսակցությանն անդամագրվելուց անմիջապես հետո ստացա իմ վաղեմի գործընկերների, իսկ հիմա նաև համակուսակցական գործընկերների վստահության քվեն և ընդգրկվեցի Գործադիր մարմնում»,- այսօր ՀՀԿ համագումարից հետո ճեպազրույցի ժամանակ հայտարարեց պաշտպանության նախարար Վիգեն Սարգսյանը:
Ըստ նրա` կուսակցական գործունեությունը ստանում է նոր շատ ավելի խորքային իմաստ և կուսակցությունների ամրապնդումը դառնում է քաղաքական մշակույթի ձևավորման կարևոր տրամաբանական բաղադրիչ մասը: Նա նշեց, որ պատասխանատվությունը մեծ է. «Ինձ համար այսօրվա ամենակարևոր խորհուրդներից մեկն այն էր, որ ես լսեցի բացարձակ միակարծություն բոլոր ելույթներում, հատկապես ՀՀ կուսակցության նախագահի խոսքն առ այն, որ պաշտպանությունը դառնում է առանցքային խնդիրներից մեկը»:
Վ.Սարգսյանի խոսքով` մեծ աշխատանք կա անելու և ինքը տրամադրված է շատ վճռորոշ այդ աշխատանքը տեղ հասցնելու, նաև ազգ-բանակը դառնում է աշխատանքի առանցքային ուղղություն: Նա նկատեց, որ եկել է աջակցելու այն աշխատանքում, որ արվել է երկար տարիներ: Թե ինչո՞ւ հենց հիմա, այս փուլում որոշեց դառնալ կուսակցական, Վ.Սարգսյանը պատասխանեց, որ նախքան այս զբաղեցրել է հանրապետության բարձրագույն հայեցողական պաշտոնը և սերտ փոխգործակցություն է ունեցել իշխող կուսակցության հետ.
«Նախարարի պաշտոնը քաղաքական պաշտոն է և անտրամաբանական կլիներ չհստակեցնել իր հարաբերությունը ՀՀԿ-ի հետ: Շատ ավելի կարևոր հանգամանք է սահմանադրական բարեփոխումների արդյունքում ձևավորվող նոր քաղաքական մշակույթը, որին ես որոշեցի այդպես առաջ գնալ և կուսակցական պատկանելիությամբ ընդգծել դրա կարևորությունը»:
