«Քաղաքականությունից նա գնացել է իր հայտարարությամբ և կարող է վերադառնալ իր հայտարարությամբ». Ստեփան Մարգարյանը՝ Գագիկ Ծառուկյանի մասին
ԱԺ պատգամավոր, «Համախմբում» կուսակցության փոխնախագահ Ստեփան Մարգարյանը դեռևս վաղ է համարում խոսել ԲՀԿ նախկին առաջնորդ Գագիկ Ծառուկյանի՝ քաղաքականություն վերադառնալու մասին: Ազգային ժողովում լրագրողների հետ զրույցում, անդրադառնալով Գագի&կ Ծառուկյանի՝ ակտիվ քաղաքականություն վերադառնալու մասին խոսակցություններին, Ստեփան Մարգարյանն ընդգծեց, որ հարկ կհամարի այդ մասին խոսել այն ժամանակ, երբ կլինի Գագիկ Ծառուկյանի հայտարարությունը:
«Մենք շատ հարգում ենք Գագիկ Ծառուկյանին: Նա հասարակության և պետության համար բավականին շատ գործեր արած անձնավորություն է և հիմա էլ շարունակում է իր նպաստը բերել տարբեր բնագավառներում: Քաղաքականությունից նա գնացել է իր հայտարարությամբ և կարող է վերադառնալ իր հայտարարությամբ: Ես իմ կողմից ոչ կոռեկտ եմ համարում անդրադառնալ այլ ենթադրություններին և խոսակցություններին: Կհայտարարի, որ ինքը վերադառնում է, բոլորովին այլ իրավիճակ կլինի, չի հայտարարի, ես այդ մասին խոսելն անիմաստ եմ համարում»,- նշեց պատգամավորը:
Հարցին, ի՞նչ իրավիճակ կլինի, եթե Գ. Ծառուկյանը որոշի վերադառնալ, Ստեփան Մարգարյանը պատասխանեց. «Ես եթե-ներով հարցերի չեմ պատասխանում: Եթե հայտարարի, որ վերադառնում է, այդ ժամանակ, բնականաբար, կլինի նոր իրավիճակ, և այդ ժամանակ նոր կխոսենք»:
Ստեփան Մարգարյանն անդրադարձավ նաև դիտարկմանը, թե ԲՀԿ-ն ավելի ուժեղ էր Գագիկ Ծառուկյանի հետ, քան առանց նրա: Պատգամավորը չցանկացավ մեկնաբանել, թե ով ում հետ է ավելի ուժեղ: «Ես կարող եմ իմ մասին, իմ կուսակցության և իմ գործընկերների մասին խոսել»,- ասաց պատգամավորը:
