«Հասմիկ Պողոսյանը՝ Օպերային թատրոնո՞ւմ… Ներեցեք՝ No comment». Կարինե Խոդիկյան
Մշակութային քաղաքականության, դրա հետևանքների թեմայով այսօր հրավիրված մամուլի ասուլիսի ընթացքում բանախոսներ արձակագիր Գուրգեն Խանջյանը, դրամատուրգ Կարինե Խոդիկյանը և դերասանուհի Կարինե Ջանջուղազյանն անդրադարձ կատարեցին նաև վերջերս 168.am-ում տպագրված՝ ««Նախկին նախարար Հասմիկ Պողոսյանն ինձ ասաց՝ կմտածենք, թե ինչպես կարելի է իմ փորձը և հմտություններն օգտագործել». Հասմիկ Պապյանը՝ օպերային թատրոնի գեղարվեստական ղեկավարի պաշտոնում չնշանակվելու մասին» հրապարակմանը, որը հասարակական լայն քննարկումների առիթ էր դարձել:
Ասուլիսի բանախոսներից և ոչ մեկը չի կարողանում Մշակույթի նախկին նախարար Հասմիկ Պողոսյանին պատկերացնել Օպերային թատրոնում՝ տնօրենի կամ գեղարվեստական ղեկավարի պաշտոնում:
«Ես այս ամենին տեղյակ եմ, մամուլից տեղեկացա նաև, որ Օպերային թատրոնի ներկայիս գեղարվեստական ղեկավարը հայտարարել էր, թե իր զբաղվածությունն այնքան մեծ է, որ չի կարողանում մասնակից դառնալ թատրոնի ամենօրյա աշխատանքներին: Ես շատ եմ հարգում Օրբելյան-կրտսերի վաստակը, բայց ուզում եմ, որ գեղարվեստական ղեկավարն առավոտյան ներկայանա աշխատանքի և գիշերը՝ բոլորից ամենավերջում, դուրս գա թատրոնից: Սա իմ կարծիքն է: Ցանկացած մեծության հրավիրեք Օպերային թատրոն, և նա այնտեղ ներկայանա 4 ամսում միայն 4 անգամ… նման բան գոյություն չունի»,- ասաց դրամատուրգ Կարինե Խոդիկյանը:
Ասուլիսավարի դիտարկմանը, թե սա հատուկ մտածված ծրագիր էր, որը մի օր հանգուցալուծվելու է այնքանով, որ Օրբելյան-կրտսերը՝ պատճառաբանելով գերզբաղվածությունը, հայտարարելու է Օպերային թատրոնից հեռանալու մասին, և այդ կամ Օպերային թատրոնի տնօրենի պաշտոնում կարող է հայտնվել, օրինակ՝ Հասմիկ Պողոսյանը, Կարինե Խոդիկյանն արձագանքեց. «Հասմիկ Պողոսյանը՝ Օպերային թատրոնո՞ւմ… Ներեցեք՝ no comment»:
Անդրադառնալով թեմային՝ ասուլիսին մասնակից, բանախոս դերասանուհի Կարինե Ջանջուղազյանը ևս հակիրճ գտնվեց.
«Մենք արդեն տեսանք, թե իր պաշտոնավարման ընթացքում ինչեր արեց Հասմիկ Պողոսյանը Մշակույթի նախարարությունում, ուրեմն նրան այնտեղ նշանակողների համար պետք է նախապես պարզ լինի, թե ինչե՞ր կարելի է ակնկալել նրա ներկայությունից՝ այս անգամ արդեն՝ Օպերային թատրոնում…»:
