Կալեում ոստիկանությունը ցրել է փախստականների ճամբարի մոտ բողոքի ակցիան
Ֆրանսիայի ոստիկանությունն արցունքաբեր գազ և ջրցան մեքենաներ է կիրառել ցուցարարների դեմ, որոնք շաբաթ օրը հավաքվել են Ֆրանսիայի Կալե քաղաքի մոտ՝ փախստականների ճամբարի հարևանությամբ: 
Մոտ 200 ներգաղթյալ և ևս 50 ակտիվիստ բողոքի ակցիա էր կազմակերպել փախստականների ճամբարում վատ կենսապայմանների դեմ, որը հայտնի է «Ջունգլիներ» անվանմաբ:
Ակցիայի որոշ մասնակիցներ իրենց ձեռքին պահել են բրիտանական դրոշներ՝ ընդգծելով, որ այդկերպ պահանջում են Մեծ Բրիտանիայի վարչապետ Թերեզա Մեյից՝ ընդունել մեծաթիվ փախստականների: 
Ոստիկանությունը փորձել է ցուցարարներին դուրս մղել ճամբարի տարածքից, ցուցարարները, ի պատասխան, քարեր են նետել իրավապահների ուղղությամբ:
Կալեի փախստականների ճամբարում վերջին 2 տարում կուտակվել են հազարավոր ներգաղթյալներ, որոնք փորձում են հայտնվել Մեծ Բրիտանիայում:
Ֆրանսիայի նախագահ Ֆրանսուա Օլանդը հայտարարել է, որ Կալեի ճամբարը մինչև տարեվերջ քանդվելու է: 
