Սևանա լճից սկսվել են ջրբացթողումները
Թեև հունիսի 9-ից Սևանա լճից սկսվել են ջրբացթողումները, այդուհանդերձ, լճի մակարդակը շարունակել է հետագա մի քանի օրերի ընթացքում դրական նիշ արձանագրել: Ինչպես «Արմենպրես»-ին տեղեկացրին Գավառի Օրհուս բնապահպանական տեղեկատվական կենտրոնից, հունիսի 9-ից 13-ի ընթացքում Սևանա լճից ոռոգման նպատակով արդեն բաց է թողնվել 5 միլիոն 406 հազար խորանարդ մետր ջուր: Օրական միջին թողունակությունը կազմել է 1 միլիոն 114 հազար խորանարդ մետր ջուր:
2014 թվականի հունիսի 13-ի դրությամբ Սևանա լիճը ծովի մակարդակից գտնվել է 1900 մետր 73 սանտիմետր բարձրության վրա, ինչը 16 սանտիմետրով բարձր է մնում նախորդ տարվա նույն օրվա և 6 սանտիմետրով բարձր՝ այս տարվա մայիսի 29-ի նիշից: ԱրփաՍեւան թունելային ջրատարով այս տարվա ընթացքում Սևանա լիճ է մուտք եղել 79 միլիոն 444 հազար, ստորեկրյա հոսքով՝ 12 միլիոն 596 հազար խորանարդ մետր ջուր:
