Բաֆետը 1 մլրդ դոլարով Apple-ի 9,8 մլն բաժնետոմս է գնել
Ամերիկացի միլիարդատեր Ուորեն Բաֆետը Apple ընկերության բաժնետոմսեր է գնել՝ վճարելով 1 մլրդ դոլար: Այս մասին հայտնել է Բաֆետի ներդրումային ընկերությունը՝ Berkshire Hathaway-ը:
Ընկերությունը ձեռք է բերել կորպորացիայի ավելի քան 9,8 մլն բաժնետոմս՝ մեկ արժեթղթի համար վճարելով միջինը 109 դոլար: Գործարքի գնման պահին դրանք շուկայում գնահատվում Էին 90 դոլար:
Տարեսկզբից սմարթֆոնների վաճառքների կրճատման պատճառով Apple-ի բաժնետոմսերի գինն ընկել է 14 տոկոսով:
Բաֆետի կողմից Apple-ի արժեթղթերի գնման լուրը հանգեցրել է դրանց թանկացման: Մայիսի 16-ին սակարկությունների փակման պահին Apple-ի բաժնետոմսերը գնահատվում էին արդեն 93,88 դոլար՝ 3,7 տոկոսով ավելի, քան մայիսի 13-ին բորսայի փակման ժամանակ:
Ընթացիկ տարվա առաջին եռամսյակում Apple-ը վաճառել է մոտավորապես 51,2 մլն սմարթֆոն, հասույթը կազմել է 50,55 մլրդ դոլար, իսկ զուտ շահույթը՝ 10,5 մլրդ դոլար: 2015 թվականի առաջին երեք ամսում ընկերությանը հաջողվել էր իրացնել 61,2 մլն գաջեթ: iPhone-ների վաճառնքերի ծավալներն անընդմեջ աճում էին վերջին ութ տարվա ընթացքում, հաղորդել է ՏԱՍՍ-ը:
