Ֆիդել Կաստրոն չի վստահում Կուբայի հանդեպ ԱՄՆ-ի քաղաքականությանը
Բրիտանական Reuters լրատվական գործակալության փոխանցմամբ՝ կուբայական հեղափոխության 88-ամյա առաջնորդ Ֆիդել Կաստրոն առաջին անգամ մեկնաբանել է Կուբայի ու ԱՄՆ-ի միջև դիվանագիտական հարաբերությունների վերականգնման գործընթացը:
Նա հավանության է արժանացրել երկու երկրների ղեկավարների՝ Ռաուլ Կաստրոյի ու Բարաք Օբամայի մերձեցման ուղղությամբ գործադրած քայլերը: Դրա հետ մեկտեղ նա հայտարարել է, որ չի վստահում ԱՄՆ-ի քաղաքականությանը և նրա ներկայացուցիչների հետ չի փոխանակի գեթ մեկ բառ.
«Սակայն դա չի նշանակում ռազմական հակամարտությունների խաղաղ կարգավորումից հրաժարում: Մենք մշտապես պաշտպանելու ենք աշխարհի բոլոր ժողովուրդների հետ համագործակցությունն ու բարեկամությունը, այդ թվում նաև մեր քաղաքական հակառակորդների հետ»:
Երկու երկրների միջև հարաբերությունները կտրուկ վատթարացել են 1960 թվականին, այն բանից հետո, ինչ 1959 թվականի հեղափոխության արդյունքում կղզում իշխանության եկավ Ֆիդել Կաստրոն:
