Տարածաշրջանի երկրների նախարարներն Օմանում կհամաձայնեցնեն Հորմուզով նավերի անցման մեխանիզմը. Փեզեշքիան
Իրանի նախագահ Մասուդ Փեզեշքիանը հայտարարել է, որ տարածաշրջանի արաբական երկրների արտաքին գործերի նախարարները երկուշաբթի օրը կհանդիպեն Օմանում՝ Հորմուզի նեղուցով նավարկության կարգը համաձայնեցնելու և ձեռք բերված պայմանավորվածության մասին համապատասխան միջազգային ծովային կազմակերպությանը տեղեկացնելու համար։ Այս մասին նա ասել է India Today-ին տված հարցազրույցում՝ Նյու Դելիում կայացած ԲՐԻԿՍ-ի գագաթնաժողովի շրջանակում, հաղորդում է իրանական Tasnim գործակալությունը։
Ըստ Փեզեշքիանի, Իրանը արդեն բանակցություններ է վարել Օմանի հետ և պայմանավորվածություն է ձեռք բերել նեղուցով նավարկության կոնկրետ մեխանիզմի շուրջ։ Նա ընդգծել է, որ այդ մեխանիզմի համաձայն՝ երթուղին բաց կլինի միջազգային իրավունքի շրջանակում, պայմանով, որ ԱՄՆ-ն դադարեցնի Իրանի դեմ իր «ագրեսիան և անարդար հարձակումները»։
«Այս մեխանիզմի շրջանակում երթուղին բաց կլինի միջազգային իրավունքին համապատասխան, պայմանով, որ ԱՄՆ-ն դադարեցնի իր ագրեսիան և անարդար հարձակումները», — ասել է Իրանի նախագահը։
Փեզեշքիանը հայտարարել է, որ Թեհրանը խնդիրներ չունի հարևան երկրների հետ, այդ թվում՝ Արաբական Միացյալ Էմիրությունների, Սաուդյան Արաբիայի, Պակիստանի և Կատարի, ինչպես նաև Ռուսաստանի և Չինաստանի հետ։ Ըստ նրա, Իրանը դեմ է տարածաշրջանում ամերիկյան ռազմական բազաների օգտագործմանը՝ Իրանի տարածքի վրա հարձակումներ իրականացնելու համար։
Իրանի նախագահը նաև հայտարարել է, որ իր երկիրը պատերազմ չի սկսել և միայն պաշտպանվել է ԱՄՆ-ի և Իսրայելի գործողություններից։ Նա տարածաշրջանի երկրներին կոչ է արել համատեղ ապահովել խաղաղությունն ու անվտանգությունը՝ թույլ չտալով արտաքին ուժերին տարաձայնություններ ստեղծել հարևանների միջև։
Խոսելով ԲՐԻԿՍ-ի մասին՝ Փեզեշքիանը նշել է, որ միավորումը կարող է դիմակայել միակողմանի պատժամիջոցներին և ԱՄՆ-ի քաղաքականությանը՝ մասնակից երկրների միջև անկախ առևտրի, ներդրումների և տնտեսական համագործակցության ընդլայնման շնորհիվ։ Նրա կարծիքով, ԲՐԻԿՍ-ի Նոր զարգացման բանկը նույնպես կարող է նպաստել համատեղ ներդրումներին և նվազեցնել երկրների կախվածությունը ամերիկյան տնտեսությունից ու դոլարից։
Իրանի նախագահը մերժել է միջուկային զենք ձեռք բերելու ձգտման մասին մեղադրանքները։ Նա հայտարարել է, որ Թեհրանը հավատարիմ է Միջուկային զենքի չտարածման պայմանագրին և պատրաստ է բանակցություններ վարել միջազգային իրավունքի շրջանակում։
Փեզեշքիանն ընդգծել է, որ Իրանը չի ձգտում պատերազմի, սակայն մտադիր չէ հրաժարվել իր դիրքորոշումներից պատժամիջոցների կամ ռազմական սպառնալիքների ճնշման տակ։ Նա նաև դատապարտել է Իրանի գերագույն առաջնորդ Ալի Խամենեիի, հրամանատարների, գիտնականների և երկրի ենթակառուցվածքային օբյեկտների վրա հարձակումները, ինչպես նաև սննդամթերքի և դեղորայքի մատակարարումների ու արտաքին առևտրի սահմանափակումները։
Հորմուզի նեղուցը առանցքային նշանակություն ունի նավթի և գազի համաշխարհային մատակարարումների համար, ուստի դրանով նավարկության ցանկացած սահմանափակում կարող է ազդեցություն ունենալ համաշխարհային էներգետիկ շուկաների վրա։
