Ռուսաստանը Զապորոժիեին հարվածել է հյուսիսկորեական արտադրության բալիստիկ հրթիռներով․ Զելենսկի
Ռուսաստանը Զապորոժիեին հարվածել է հյուսիսկորեական արտադրության բալիստիկ հրթիռներով, «Ցիրկոն» հրթիռներով և կառավարվող ավիառումբերով (GAB), այս մասին Ուկրաինայի նախագահ Վլադիմիր Զելենսկին հայտարարել է Telegram-ում:
«Սա դաժան հարձակում է, որը նախատեսված է քաղաքացիական ենթակառուցվածքներին առավելագույն վնաս հասցնելու համար։ Դժբախտաբար, քաղաքում այս պահին հայտնի է վեց մարդու զոհվելու և 19-ի վիրավորվելու մասին», – նշել է Ուկրաինայի առաջնորդը։
Զելենսկու խոսքով, հարվածներ են հասցվել նաև Դոնեցկի, Դնեպրոպետրովսկի և Նիկոլաևի մարզերին։ Հրթիռներից բացի, Ուկրաինայի վրա հարձակվել են ավելի քան 120 անօդաչու թռչող սարքեր, որոնց մեծ մասը «Շահեդ» դասի։
«Ռուսաստանի ձեռնարկած յուրաքանչյուր քայլ՝ բալիստիկ հրթիռների արտադրության ավելացումը, Հյուսիսային Կորեայի միջոցների օգտագործումը, զորահավաքի նախապատրաստումը, այս ամենը ցույց է տալիս, որ Մոսկվան պատրաստվում է ոչ թե խաղաղության, այլ սրման», – ընդգծել է նա։
