Պաշտպանի գրասենյակի աշխատակիցները հանդիպել են 4 օր շարունակ զորամասը լքած զինծառայողին
ՀՀ մարդու իրավունքների պաշտպանի զինծառայողների հարցերով խորհրդական Երանուհի Թումանյանցը և արագ արձագանքման բաժնի աշխատակից Հաբեթ Մարտիրոսյանն այսօր այցելեցին Լուսակերտում տեղակայված զորամաս և զրուցեցին 4 օր շարունակ զորամասը լքած ժամկետային զինծառայող Տարոն Հայրունու հետ:
Տարոն Հայրունու հետ առանձնազրույցի ժամանակ պարզվել է, որ ինչպես զորամասը լքելուց առաջ, այնպես էլ հետո իր նկատմամբ որևէ բռնություն կամ խոշտանգում չի կիրառվել, ավելին` նկատի ունենալով իր կողմից զորամասը լքելու հանգամանքների վերաբերյալ ոչ հստակ պարզաբանումներ ներկայացնելը, զորամաս վերադառնալուց անմիջապես հետո զննվել է հոգեբույժի կողմից, ով ամբողջովին առողջ է համարել իրեն:
Զորամասի հրամանատարի փոխանցմամբ սերժանտ Տարոն Հայրունին հանդիսանում է լավագույն զինծառայողներից մեկը, երբևէ որևէ գանգատ չի ներկայացրել և որևէ խնդիր չի ունեցել:
Փաստի առթիվ հարուցվել է քրեական գործ ՀՀ քրեական օրենսգրքի 362-րդ հոդվածով, որը նախատեսում է ազատազրկում՝ երեքից վեց տարի ժամկետով:
