Գազայի առողջապահության նախարարությունը հայտնել է, որ Իսրայելի հարվածների հետևանքով մեկ օրում ութ պաղեստինցի է զոհվել
Գազայի հատվածում անցած օրվա ընթացքում իսրայելական զինված ուժերի հարվածների հետևանքով առնվազն 8 պաղեստինցի է զոհվել, ևս 26-ը՝ վիրավորվել։ Այս ամենը տեղի է ունեցել 2025 թվականի հոկտեմբերից գործող հրադադարի ռեժիմի պայմաններում։ Այսպիսի տվյալներ է հրապարակել հատվածի առողջապահության նախարարությունն իր տելեգրամյան ալիքում։
Գերատեսչության տեղեկություններով՝ հրադադարի հաստատումից ի վեր Գազայում իսրայելցի զինվորականների գործողությունների հետևանքով ընդհանուր առմամբ զոհվել է 1053 տեղացի բնակիչ, տուժել է ավելի քան 3,4 հազարը։
Նախորդ օրը անկլավի իշխանությունների մամուլի ծառայությունն իր տելեգրամյան ալիքով տեղեկացրել էր, որ հրադադարի ռեժիմի ուժի մեջ մտնելու պահից ի վեր պաղեստինյան կողմն արձանագրել է Իսրայելի կողմից ձեռք բերված պայմանավորվածությունների խախտման 3465 դեպք։ Բացի այդ, Գազայի իշխանությունների պնդմամբ, այս ժամանակահատվածում հատվածի տարածք է մուտք գործել տեղի բնակչության տարրական կարիքները հոգալու համար անհրաժեշտ հումանիտար օգնության ընդհանուր ծավալի միայն մոտ 36%-ը։
Մերձավոր Արևելքում իրավիճակը կտրուկ սրվել էր 2023 թվականի հոկտեմբերի 7-ին Գազայի հատվածից պաղեստինյան ՀԱՄԱՍ շարժման զինված կողմնակիցների Իսրայելի տարածք ներխուժումից հետո, որն ուղեկցվել էր սահմանամերձ բնակավայրերի բնակիչների սպանություններով և պատանդների գերեվարմամբ։ Ի պատասխան՝ Իսրայելը ռազմական գործողություն էր սկսել անկլավում՝ նպատակ ունենալով ոչնչացնել ՀԱՄԱՍ-ի ռազմական ու քաղաքական կառույցները և ազատ արձակել բոլոր առևանգվածներին։
