Նեթանյահուն ակնկալում է, որ Սիրիան Դամասկոսից մինչև Հերմոն լեռ և այլ տարածքներ ապառազմականացված բուֆերային գոտի կստեղծի
Իսրայելի վարչապետ Բենիամին Նեթանյահուն երեքշաբթի հայտարարել է, որ Սիրիայի հետ համաձայնագիրը հնարավոր է, և նա ակնկալում է, որ Սիրիայի կառավարությունը Դամասկոսից մինչև Հերմոն լեռ և այլ տարածքներ ապառազմականացված բուֆերային գոտի կստեղծի. հաղորդում է Reuters-ը։
Նեթանյահուն ելույթ է ունեցել ԱՄՆ նախագահ Դոնալդ Թրամփի հետ զրույցից մեկ օր անց. Թրամփի վարչակազմը փորձում է բանակցել երկու երկրների միջև չհարձակման մասին պայմանագրի շուրջ, և կարևոր է համարում, որ Իսրայելը Դամասկոսի հետ «ուժեղ և անկեղծ երկխոսություն» պահպանի։
Սիրիան պաշտոնապես չի ճանաչում Իսրայելը, որը 2024 թվականի դեկտեմբերից ի վեր ավելի շատ սիրիական տարածքներ է գրավել։ 1967 թվականի պատերազմի ժամանակ Իսրայելը գրավել և հետագայում բռնակցման ենթարկել է սիրիական Գոլանի բարձունքները, ինչը ճանաչել է Միացյալ Նահանգները, մինչդեռ մյուս երկրների մեծ մասը չի ճանաչել։
«Մենք, իհարկե, Սիրիայից ակնկալում ենք ապառազմականացված բուֆերային գոտու ստեղծում Դամասկոսից մինչև բուֆերային գոտի, ներառյալ Հերմոն լեռ և Հերմոն լեռ մուտքերը,- ասել է Նեթանյահուն՝ կենտրոնական Իսրայելում վիրավոր զինվորներին այցելելիս։ -Մենք պահպանում ենք այս տարածքները՝ Իսրայելի քաղաքացիների անվտանգությունն ապահովելու համար, և դա մեր պարտականությունն է։ Բարի կամքի և այս սկզբունքների ըմբռնման դեպքում հնարավոր է համաձայնության գալ սիրիացիների հետ, սակայն մենք ամեն դեպքում հավատարիմ կմնանք մեր սկզբունքներին»,- ասել է Իսրայելի վարչապետը։
Թրամփը հավանություն է տվել Սիրիայի նոր առաջնորդ Ահմեդ աշ-Շարաային, մինչդեռ Իսրայելը զգուշություն է հայտնել աշ-Շարաայի ծայրահեղական խմբավորումների հետ նախկինում ունեցած կապերի առնչությամբ, սակայն ջանքեր է գործադրել համաձայնության հասնելու համար։
Սիրիական պետական լրատվամիջոցները հաղորդել են, որ ուրբաթ Սիրիայի հարավում Իսրայելի իրականացրած հարձակման հետևանքով զոհվել է 13 սիրիացի։ Իսրայելական բանակը հայտարարել է, որ թիրախը լիբանանյան «Հըզբոլլահ» շարժումն էր։ Երեքշաբթի Նեթանյահուն այցելել է բախումների ժամանակ վիրավորված զինվորներին։
