Վիգեն Էուլջեքչյանի ներկայացուցիչները նամակ են գրել Դոնալդ Թրամփին
Բաքվի բանտում պահվող Վիգեն Էուլջեքչյանի ներկայացուցիչները նամակ են գրել ԱՄՆ նախագահ Դոնալդ Թրամփին` խնդրելով միջնորդնել, որ նա ազատ արձակվի բանտից։
Այս մասին Sputnik Արմենիայի հետ զրույցում ասաց Էուլջեքչյանի ընտանիքի մտերիմ, «Պայքար» թերթի խմբագրակազմի անդամ Բայդզիգ Քալաջյանը։
Ավելի վաղ հայտնել էինք, որ Էուլջեքչյանի վիճակը բանտում կտրուկ վատացել է։ Նա չի կարողանում քայլել, կարիք ունի անվասայլակի, որը չի տրամադրվում։ Նրան տարել են բժշկի մոտ, բայց նա դեղորայք չի ստանում։ Նա մնում է առանց բժշկական օգնության՝ մարդասիրական տարրական նորմերի խախտմամբ։
Քալաջյանը տեղեկացրեց, որ սա առաջին անգամը չէ, որ փաստաբանները դիմում են միջազգային կառույցներին։ Այս անգամ որոշեցին նամակները կրկին ուղարկել` նշելով նաև Էուլջեքչյանի առողջական վիճակի վատթարացումը։
«Նա ընտանիքի հետ էլ հիմա չի կարողանում հաճախ խոսել, Կարմիր խաչն էլ չի տեսակցում նրան… Վերջին անգամ իմացանք, որ անվասայլակի կարիք ունի, բայց նա այս պահին փաստորեն զրկված է նաև բժշկական օգնությունից»,– նշեց Քալաջյանը։
Այս պահին Էուլջեքչյանների ընտանիքը Բեյրութում է բնակվում։ Նրա կինը `Լինդա Էուլջեքչյանը փոքրիկ խանութ է բացել, որպեսզի կարողանա գումար վաստակել ընտանիքի կարիքները հոգալու համար։
