Հյուսիսային Եվրոպայի և Բալթյան երկրները միջոցներ կհատկացնեն Ուկրաինային՝ զենք գնելու համար
Սկանդինավյան և Բալթյան երկրները հայտարարել են, որ 430 միլիոն եվրո կֆինանսավորեն ռազմական տեխնիկայի և զինամթերքի մատակարարումն Ուկրաինայի համար, հայտնել է ՆԱՏՕ-ն։
Սարքավորումները կգնվեն Միացյալ Նահանգներից՝ դաշինքի «Ուկրաինայի առաջնահերթ կարիքների ցանկ» (PURL) նախաձեռնության շրջանակում, որը կֆինանսավորեն Դանիան, Էստոնիան, Ֆինլանդիան, Իսլանդիան, Լատվիան, Լիտվան, Նորվեգիան և Շվեդիան, փոխանցել է Euronews-ը։
«Սկանդինավյան և Բալթյան երկրների մեր դաշնակիցները պատրաստ են ֆինանսավորել Ուկրաինայի համար կրիտիկականորեն կարևոր ռազմական տեխնիկայի ևս մեկ փաթեթ։ Այս զենքերը կարևոր են, քանի որ Ուկրաինայում ձմեռ է սկսվում։ ՆԱՏՕ-ի գծով դաշնակիցները կշարունակեն ապահովել անհրաժեշտ սարքավորումներն ու պաշարները»,- ասել է ՆԱՏՕի գլխավոր քարտուղար Մարկ Ռյութեն։
