Իսրայելը «միակողմանի պատասխանով» է սպառնացել այն երկրներին, որոնք պատրաստվում են ճանաչել Պաղեստինի պետությունը
Իսրայելի արտաքին գործերի նախարար Գիդեոն Սաարը կիրակի օրը Պաղեստինի պետականության ճանաչմանն ուղղված միջազգային հանրության վերջին ջանքերն անվանեց «սխալ» և զգուշացրեց, որ դա կարող է «միակողմանի պատասխանի» պատճառ դառնալ, հաղորդում է AFP-ը։
«Այնպիսի պետություններ, ինչպիսիք են Ֆրանսիան և Մեծ Բրիտանիան, որոնք պնդում են, այսպես կոչված, ճանաչման վրա, կատարել են լուրջ սխալ», — հայտարարել է Իսրայելի արտաքին գործերի նախարար Գիդեոն Սաարը իր դանիացի գործընկեր Լարս Լյոկկե Ռասմուսենի հետ համատեղ մամուլի ասուլիսի ժամանակ։
Ըստ նրա, այդ ծրագրերի իրականացումը «կխոչընդոտի խաղաղության հասնելուն»։ «Դա կխաթարի տարածաշրջանի կայունությունը։ Դա նաև կստիպի Իսրայելին գնալ միակողմանի որոշումների», — հավելել է նա։
Ավելի վաղ Իսրայելը հաստատել էր մի շարք նոր բնակավայրեր Արևմտյան ափում, այդ թվում՝ մի խոշոր նախագիծ Երուսաղեմի արևելքում՝ հայտնի որպես E1, որը, ըստ միջազգային հանրության, սպառնում է ապագա պաղեստինյան պետության կենսունակությանը։ Իսրայելի բոլոր բնակավայրերը օկուպացված պաղեստինյան տարածքներում համարվում են անօրինական՝ միջազգային իրավունքի համաձայն։ Իսրայելի ծայրահեղ աջակողմյան ֆինանսների նախարար Բեցալել Սմոտրիչը հայտարարել է, որ E1 նախագիծը նպատակ ունի «թաղել պաղեստինյան պետության գաղափարը»։
Մի շարք երկրներ, այդ թվում՝ Ֆրանսիան և Մեծ Բրիտանիան, այս ամսվա ընթացքում ՄԱԿ-ի Գլխավոր ասամբլեայի 80-րդ նստաշրջանի շրջանակներում խոստացել են ճանաչել Պաղեստինի պետությունը։
Ֆրանս-իսրայելական հարաբերությունները հատկապես լարված են դարձել այն բանից հետո, երբ Ֆրանսիայի նախագահ Էմանուել Մակրոնը հայտարարել է իր երկրի ծրագրերի մասին և հուլիսին Սաուդյան Արաբիայի հետ համատեղ ՄԱԿ-ում անցկացրել է երկու պետությունների գոյությանն ուղղված կոնֆերանս։
Մեծ Բրիտանիայի վարչապետ Քիր Ստարմերը նախորդ ամսվա ընթացքում հայտարարել է, որ իր երկիրը կհետևի այդ օրինակին և կճանաչի Պաղեստինի պետությունը, եթե Իսրայելը չհամաձայնի հրադադարի՝ Գազայի պատերազմում, որը հրահրվել էր ՀԱՄԱՍ-ի հարձակմամբ Իսրայելի վրա 2023 թվականի հոկտեմբերին։
