Ալիևն ու Էրդողանն անդրադարձել են տարբեր ոլորտներում երկկողմ հարաբերությունների ընդլայնմանը
Շանհայի համագործակցության կազմակերպության գագաթնաժողովի շրջանակներում տեղի է ունեցել Թուրքիայի նախագահ Ռեջեփ Թայիփ Էրդողանի և Ադրբեջանի նախագահ Իլհամ Ալիևի հանդիպումը։
Ադրբեջանական ԶԼՄ-ները հայտնում են, որ հանդիպմանը կողմերն անդրադարձ են կատարել տարբեր ոլորտներում երկկողմ հարաբերությունների ընդլայնմանը, ներառյալ՝ Էներգետիկայի և տրանսպորտի ոլորտները։
Երկրների նախագահները քննարկել են ադրբեջանական SOCAR-ի և թուրքական Botaş ընկերության միջև համագործակցությունը: Նշվել է ադրբեջանական գազի Սիրիա մատակարարման կարևորությունը Թուրքիայի միջոցով՝ Կատարի ֆինանսական աջակցությամբ:
Քննարկվել են նաև Ադրբեջանի և Թուրքիայի կողմից այլ երկրներում համատեղ էներգետիկ նախագծերի իրականացման հետ կապված հարցեր:
Ընդգծվել է մի քանի օր առաջ կայացած Կարս-Իգդիր-Դիլուջու երկաթուղային գծի հիմնարկեքի արարողության կարևորությունը: Կարծիքների փոխանակում է տեղի ունեցել Ադրբեջանում, այդ թվում՝ Նախիջևանի շրջանում իրականացվող երկաթուղային նախագծերի վերաբերյալ:
Էրդողանն ու Ալիևը քննարկել են Նաև Ադրբեջանի և Հայաստանի միջև հարաբերությունների կարգավորման գործընթացը։
Նշվել է որ թյուրքալեզու պետությունների կազմակերպության հաջորդ գագաթնաժողովը տեղի կունենա այս տարի Ադրբեջանում։
