ՀՀ-ն իր ինքնիշխանության հաշվին ստացավ Թրամփի անվան միջազգային «տրաս», որտեղ չկա որևէ երաշխիք՝ բացի նարնջագույն մազերով Թրամփի խոստումից․ Նաիրա Զոհրաբյան
Նախօրեին ԱԳ նախարար Արարատ Միրզոյանն ասել էր. Նախկինում քանիցս առիթ ունեցել ենք ասելու, որ Խաղաղության համաձայնագրի բովանդակությունը հիմնականում հայտնի է հանրությանը, նշել ենք, թե դրանում ինչ կա և ինչ վստահաբար չկա։ Օգոստոսի 11-ին, ինչպես պայմանավորվել ենք ադրբեջանական կողմի հետ, նախաստորագրված համաձայնագրի տեքստը կհրապարակվի։ Ողջամտության կանխավարկածով այդ պահից բոլոր շահարկումներն ուղղակի կդադարեն»։
Հանրային ու քաղաքական գործիչ Նաիրա Զոհրաբյանը 168.am-ի հետ զրույցում անդրադառնալով վաշինգտոնյան գործընթացներին՝ նկատեց, որ «հերթական կապիտուլյացիա»-ի մասին գլոբալ գնահատականի համար պետք է նայել, թե որ երկիրն ինչ շահեց։
«Թրամփը շահեց հերթական շոուն և Նոբելյան մրցանակի իր տիտղոսը։ Թրամփն ամեն ինչ անում էր, որպեսզի այդ մրցանակը ստանար ռուս-ուկրաինական պատերազմը կարգավորելով, ինչը չստացվեց, և հիմա կպավ 2-րդ տարբերակը։
Ադրբեջանը շահեց առանց խաղաղության պայմանագրի՝ միջանցք, ինչն Ադրբեջանի երազանքն էր, Ադրբեջանը ստացավ այդ միջանցքում փայատեր լինելու իրավունք, որն արձանագրվեց եռակողմ հուշագրում։ Բացարձակապես հասկանալի չէ, թե ինչու պիտի Ադրբեջանը ստորագրի մի հուշագրի տակ, որը վերաբերում է բացառապես ՀՀ կողմից ճանապարհի հսկողության՝ ԱՄՆ-ին արտապատվիրակմանը. ի՞նչ կապ ուներ այդտեղ Ալիևի ստորագրությունը։
Նշանակում է՝ Ալիևը դառնում է միջանցքի փայատեր՝ դրանից բխող իրավական բոլոր հետևանքներով, ինչը մենք կտեսնենք առաջիկայում։ Ու պատահական չէ, որ արդեն ադրբեջանական մամուլը գրում է տեղեկություն, որ նույնիսկ կազմակերպության ընտրությունը, որին պետք է արտապատվիրակվեն ծառայությունները, չի կարող լինել առանց Ադրբեջանի համաձայնության։
Ադրբեջանն առանց խաղաղության պայմանագրի ստորագրման՝ ստացավ ԵԱՀԿ Մինսկի խմբի լուծարումը, ինչն Ադրբեջանի պահանջներից էր, ապա նաև՝ խոստում, որը, ինչպես Ալիևը ձևակերպեց՝ «տնային առաջադրանք» է՝ գնալ սահմանադրական փոփոխությունների։ Սա նշանակում է՝ մեր Սահմանադրությունից հանել Հայաստանի Անկախության հռչակագիրը, սպանել Հայաստանի 3-րդ Հանրապետությունը»,- մանրամասնեց Նաիրա Զոհրաբյանը։
Անդրադառնալով Հայաստանի ձեռքբերումներին՝ նա արձանագրեց, որ Հայաստանը ոչինչ չստացավ, ստացավ Նիկոլ Փաշինյանը՝ ի հաշիվ Հայաստանի։
«Հայաստանն իր ինքնիշխանության հաշվին ստացավ Թրամփի անվան միջազգային «տրաս», որտեղ չկա որևէ երաշխիք՝ բացի մի նարնջագույն մազերով Թրամփի խոստումից, որ եթե պրոբլեմը լինի, հեռախոսը վերցրեք՝ զանգեք ինձ։
Իսկ ի՞նչ ստացավ Նիկոլը․ Նիկոլը ստացավ իր երազանքը՝ երաշխիքներ 2026 թվականի վերընտրության համար ցանկացած գնով, ու, որ այդ «ցանկացած գինը» լինելու է տոտալ ընտրակեղծիքները, որի վրա թե՛ Եվրոպան, թե՛ Միացյալ Նահանգներն աչք են փակելու, արդեն իսկ պարզ է»,- ցավով արձանագրեց քաղաքական գործիչը։
Նաիրա Զոհրաբյանն այս պրոցեսների համատեքստում անհամարժեք որակեց ընդդիմության վարքը՝ հիշեցնելով, որ այսօր Նիկոլ Փաշինյանին հեռացնելու միակ լեգիտիմ գործիքը, փաստացի, չի օգտագործվում։
«Ու այս ֆոնին մենք տեսնում ենք դիակահոտ ընդդիմություն, ընդդիմություն, որն ամեն ինչ արեց (խոսքն ամենամեծ ընդդիմադիր խորհրդարանական խմբակցության մասին է), որն ամեն ինչ արեց՝ տորպեդահարելու իմպիչմենտի գործընթացը։ Ու այդ հետվաշինգտոնյան ողբը, լացը, ստատուսները և հարցազրույցներն առոչինչ են, որովհետև այս պահին կա 1 լեգիտիմ և գործուն գործիք՝ իմպիչմենտ, որով հնարավոր է երկրում պրոցես սկսել կամ կասեցնել Վաշինգտոնը, ինչն ամենամեծ խմբակցությունն անհեթեթագույն պատճառաբանություններով չարեց»,- ամփոփեց նա։
