Շատ բաներ ապացուցելու խաղ. Հայաստան-Կոսովո
Հայաստանի ազգային հավաքականը այսօր՝ հունիսի 6-ին, ընկերական հանդիպում է անցկացնում Կոսովոյի ընտրանու հետ։ Խաղը տեղի է ունենում Կոսովոյի մայրաքաղաք Պրիշտինայի «Ֆադիլ Վոկրի» մարզադաշտում։ Հանդիպման մեկնարկը՝ 21:00-ին Երևանի ժամանակով։
Այս հանդիպումը Հայաստանի հավաքականի համար լավ հնարավորություն է փորձարկելու կազմը և պատրաստվելու առաջիկա պաշտոնական խաղերին։ Հիշեցնենք, որ Հայաստանի ազգային հավաքականը հունիսի 9-ին ևս մեկ ընկերական հանդիպում է անցկացնելու՝ այս անգամ Չեռնոգորիայի ընտրանու դեմ Պոդգորիցայում։
Հայաստան — Կոսովո. նախախաղային տրամադրություններ և հայտարարություններ
Հունիսի 6-ին Պրիշտինայում կայանալիք Կոսովո – Հայաստան ընկերական հանդիպմանն ընդառաջ՝ հունիսի 5-ին տեղի են ունեցել երկու հավաքականների գլխավոր մարզիչների և մի քանի ֆուտբոլիստների նախախաղային մամուլի ասուլիսները։
Կոսովոյի ընտրանու տրամադրվածությունը
Կոսովոյի ազգային հավաքականի գլխավոր մարզիչ Ֆրանկո Ֆոդան նախախաղային ասուլիսում նշել է, որ թիմի հիմնական նպատակը հաղթանակներն են, այլ ոչ թե փորձարկումները։
«Մեր հիմնական նպատակն առաջիկա երկու հանդիպումներում հաղթելն է։ Մենք չենք ցանկանում փորձարկումներ անել, այլ լրջորեն պատրաստվում ենք Աշխարհի առաջնության որակավորման փուլին՝ Շվեյցարիայի և Շվեդիայի դեմ խաղերին։ Նոր խաղացողներն արագ հարմարվել են թիմի խաղաոճին։ Նրանք լավ են հանդես եկել և դա հաստատել են նախորդ մարզումներում։ Թե ովքեր խաղադաշտ կդուրս գան, պարզ կդառնա վաղը՝ խաղից առաջ», – ասել է գերմանացի մասնագետը:
Հայաստանի հավաքականի նախախաղային մեկնաբանությունները
Հայաստանի ազգային հավաքականի կիսապաշտպան Ժիրայր Շաղոյանը շեշտել է, որ ընկերական հանդիպումն էլ պետք է անցկացնել առավելագույն մոտիվացիայով և օգտակարությամբ։
«Հավաքականի խաղերում միշտ պետք է փորձել առավելագույնը քաղել։ Մարզչի դավանած ֆուտբոլը շատ հետաքրքիր է, և ձեռագիրն էլ՝ նույնպես։ Մրցակիցը տարեց տարի ավելի լավ թիմ է դառնում։ Վերլուծել ենք մրցակցին և կփորձենք հաջողության հասնել։ Վրաստանի դեմ խաղից հետո աշխատել ենք բացթողումների ուղղությամբ, և նման բան չպետք է կրկնվի»։
Գլխավոր մարզիչ Ջոն վան’տ Սխիպն անդրադարձել է թե՛ կազմի ընտրությանը, թե՛ նախորդ հանդիպումից հետո թիմում ստեղծված տրամադրությանը։
«Հայտացուցակում այս անգամ չի ընդգրկվել Կարեն Նալբանդյանը, քանի որ մեր մարտավարությունն այս խաղերում այլ դիրքեր է ընդգրկում։ Նա երիտասարդ է, և վստահ եմ՝ դեռ իր շանսը կստանա։ Վրաստանի հետ խաղից հետո դժվար էր տրամադրել ֆուտբոլիստներին, սակայն հավաքի ընթացքում լավ աշխատանք ենք տարել, ուսումնասիրել մեր սխալները և ստացել թիմից դրական էներգիա։ Ուրախ եմ, որ կան նոր ֆուտբոլիստներ, որոնք թակում են հավաքականի դռները»։
Հայաստանի հավաքականը Կոսովոյի դեմ խաղից հետո հունիսի 9-ին ընկերական հանդիպում կանցկացնի Չեռնոգորիայի հավաքականի հետ։ Այս հանդիպումները հնարավորություն են տալիս մարզչական շտաբին դիտարկել տարբեր մարտավարական տարբերակներ և կազմային լուծումներ՝ նախապատրաստվելով պաշտոնական խաղերին։
