Վրաստանն օրակարգից հանում է ԵՄ-ին անդամակցելու բանակցությունները մինչև 2028 թվականը
Իշխող «Վրացական երազանք» կուսակցությունը որոշում է կայացրել մինչև 2028 թվականը դադարեցնել ԵՄ-ին անդամակցության շուրջ բանակցություններ սկսելու հարցի քննարկումը: Այս մասին, ՏԱՍՍ-ի փոխանցմամբ, ճեպազրույցի ժամանակ հայտարարել է երկրի վարչապետ Իրակլի Կոբախիձեն:
«Մենք այսօր որոշում ենք կայացրել այլեւս օրակարգ չդնել բանակցությունների բացման հարցը (ԵՄ-ին անդամակցելու մասին-խմբ.) մինչև 2028 թվականը: Մենք նաև մինչև 2028 թվականը հրաժարվում ենք Եվրամիության բոլոր բյուջետային դրամաշնորհներից»,- ասել է Կոբախիձեն:
Նա նշել է, որ Վրաստանը պետք է եվրոպացի բյուրոկրատներին ցույց տա, որ իր հետ պետք է խոսել ոչ թե շանտաժով ու վիրավորանքներով, այլ արժանապատվորեն: Նրա խոսքով ՝ ԵՄ-ն հեղինակության վնաս է հասցրել Վրաստանին ՝ օգտագործելով բանակցությունների բացման թեման ՝ որպես մանիպուլյացիոն գործիք: Ուստի իշխող կուսակցության ընդունած որոշումը թույլ կտա խուսափել այդ վնասից։
Կառավարության ղեկավարը նաև ընդգծել է, որ վրացիները հպարտ ազգ են և հարուստ են պատմությամբ, ուստի Վրաստանի համար կտրականապես անընդունելի է ԵՄ-ին ինտեգրումը դիտարկել որպես ողորմություն:
