Գերմանիայի Սոցիալ-դեմոկրատական կուսակցությունը կանցլերի պաշտոնում կառաջադրի Շոլցին
Գերմանիայի ներկայիս կանցլեր Օլաֆ Շոլցը կդառնա Գերմանիայի Սոցիալ դեմոկրատական կուսակցության թեկնածուն կառավարության ղեկավարի պաշտոնում Բունդեսթագի արտահերթ ընտրություններում, որոնք նախատեսված են 2025 թվականի սկզբին։ Այս հայտարարությունն արել է կուսակցության նախագահ Լարս Կլինգբեյլը։
Ավելի վաղ՝ նոյեմբերի 21-ին, Օլաֆ Շոլցի կուսակից, Գերմանիայի պաշտպանության նախարար Բորիս Պիստորիուսը հայտարարել էր, որ չի առաջադրի իր թեկնածությունը Գերմանիայի կառավարության ղեկավարի պաշտոնում։ Նրա հայտարարությունը հրապարակվել է X սոցիալական ցանցի Գերմանիայի Սոցիալ-դեմոկրատական կուսակցության էջում։
Պիստորիուսը բացատրել է, որ կանցլերի պաշտոնում իր թեկնածությունը չառաջադրելու որոշումն միանշանակ կայացրել է ինքը։ Այս պաշտոնի համար պայքարում նա աջակցել է Շոլցին։
«Օլաֆ Շոլցը ուժեղ կանցլեր է, և նա ճիշտ թեկնածու է կանցլերի պաշտոնի համար»,- պարզաբանել է Գերմանիայի պաշտպանության նախարարը և հավելել, որ Շոլցը, իր կարծիքով, «կողմնակալ է բանականության և խոհեմության օգտին», ինչը հատկապես կարևոր է այժմյան ճգնաժամի ժամանակաշրջանում:
Նոյեմբերի 6-ին Շոլցը հայտարարել է Ազատ դեմոկրատական կուսակցության նախագահ, ֆինանսների նախարար Քրիստիան Լինդների պաշտոնանկության մասին։ Նոյեմբերի 7-ի գիշերն Ազատ դեմոկրատական կուսակցության գրեթե բոլոր նախարարները հայտարարել են, որ ինքնակամ հրաժարական են տալու։ Այսպիսով, փլուզվել է Գերմանիայում իշխող կոալիցիան, որը բաղկացած էր երեք քաղաքական ուժերից։
