ԱՄՆ-ն ՄԱԿ-ի Անվտանգության խորհուրդ է ներկայացրել Գազայում ժամանակավոր հրադադարի վերաբերյալ բանաձև
ԱՄՆ-ն ՄԱԿ-ի Անվտանգության խորհուրդ է ներկայացրել բանաձև՝ կոչ անելով ժամանակավոր հրադադար հաստատել Իսրայելի և պաղեստինյան ՀԱՄԱՍ արմատական շարժման միջև, ինչպես նաև դեմ արտահայտվելով իր դաշնակից Իսրայելի կողմից Ռաֆահում ցամաքային խոշոր գործողության իրականացմանը։
Այս մասին հաղորդում է Reuters գործակալությունը՝ վկայակոչելով իր տրամադրության տակ հայտնված բանաձևի տեքստը։
Ավելի վաղ ԱՄՆ-ն հայտնել էր, որ վետո կդնի Ալժիրի կողմից առաջարկված բանաձևի վրա, որը պահանջում է անհապաղ հումանիտար հրադադար հաստատել Գազայում։ Վաշինգտոնի պատճառաբանությամբ՝ այդ բանաձևը կարող է վտանգի տակ դնել ԱՄՆ-ի, Եգիպտոսի, Իսրայելի և Կատարի միջև ընթացող բանակցությունները, որոնց նպատակն է հասնել պատերազմում դադարի և ՀԱՄԱՍ-ի մոտ պահվող գերիների ազատ արձակման։
Ըստ ամերիկյան տեքստի՝ ՄԱԿ-ի ԱԽ-ն պետք է «ընդգծի իր աջակցությունը Գազայում հնարավորինս շուտ ժամանակավոր հրադադար հաստատելուն, որի հիմքում ընկած կլինի բոլոր պատանդների ազատ արձակումը և անհրաժեշտ մասշտաբով հումանիտար օգնության մատակարարման բոլոր արգելքների վերացումը»։
Բանաձևի հաստատման համար հարկավոր է առնվազն 9 կողմ ձայն, ինչպես նաև վետոյի բացակայություն ՄԱԿ-ի ԱԽ մշտական անդամների՝ ԱՄՆ-ի, Ֆրանսիայի, Բրիտանիայի, Ռուսաստանի կամ Չինաստանի կողմից։
Բանաձևի տեքստը նաև ընդգծում է, որ ներկայիս պայմանները հաշվի առնելով՝ Եգիպտոսի հետ սահմանին գտնվող Ռաֆահ քաղաքում խոշոր ցամաքային գործողությունն է՛լ ավելի կվնասի քաղաքացիական անձանց և կհանգեցնի նրանց տեղահանման հարևան երկրներ։
Իսրայելը հայտարարել է, որ մտադիր է գործողություն սկսել Ռաֆահում, որտեղ ապաստանել է Գազայի հատվածի 2,3 միլիոն բնակչությունից ավելի քան 1 միլիոնը։
Reuters-ը նշում է, որ մինչ այժմ Վաշինգտոնը դեմ էր «հրադադար» բառին Իսրայել-ՀԱՄԱՍ պատերազմի վերաբերյալ ՄԱԿ-ի բոլոր բանաձևերում։
Ըստ ՄԱԿ-ի միջազգային ճգնաժամային խմբի տնօրեն Ռիչարդ Գովանի՝ Իսրայելին ԱՄՆ-ի առաջարկած բանաձևը կարող է ավելի շատ մտահոգել, քան Ալժիրի առաջարկածը։
«Այն պարզ փաստը, որ ԱՄՆ-ն ընդհանրապես ներկայացնում է այս տեքստը, նախազգուշական կրակոց է (խմբ․՝ Իսրայելի վարչապետ Բենիամին) Նեթանյահուի համար։ Դա ամենաուժեղ ազդանշանն է, որ մինչ այժմ ԱՄՆ-ն տվել է ՄԱԿ-ում, որ Իսրայելը չի կարող անվերջ հույս դնել ամերիկյան դիվանագիտական պաշտպանության վրա», – ասել է Գովանը:
Հոկտեմբերի 7-ին ՀԱՄԱՍ-ի զինյալների ներխուժումից հետո Իսրայելում 1200 մարդ էր զոհվել, 253 մարդ՝ գերեվարվել։ Իսրայելն այս ներխուժումից հետո ռազմական գործողություններ է սկսել Գազայի հատվածում։ Պատանդների մի մասը վերադարձվել է նոյեմբերին հաստատված 7-օրյա հումանիտար հրադադարի ժամանակ։ Ըստ Իսրայելի՝ ՀԱՄԱՍ-ի մոտ դեռ մնում է մոտ 130 պատանդ։ Գազայի առողջապահական իշխանությունների հաղորդած տվյալների համաձայն՝ Գազայի հատվածում Իսրայելի հարվածներից զոհերի թիվը հասել է գրեթե 29 000-ի, վիրավորների թիվը՝ 69 000-ի։
