Լեհաստանում ցուցարարները փորձել են մուտք գործել բանտ, որտեղ պահվում է ՆԳՆ-ի նախկին ղեկավարը
Մի խումբ ցուցարարներ բողոքի ցույց են անցկացրել Ռադոմ քաղաքի (Վարշավայից շուրջ 100 կմ դեպի հարավ) բանտի մոտ, որտեղ պահվում է Լեհաստանի ՆԳՆ նախկին ղեկավար Մարիուշ Կամինսկին։ Ակցիայի ընթացքում փորձ է արվել մուտք գործել քրեակատարողական հաստատության տարածք։ Այս մասին հայտնել է լեհական Onet ինտերնետային պորտալը:
Ակցիան ղեկավարել է նախկինում իշխող «Իրավունք և արդարություն» կուսակցությունից Սեյմի պատգամավոր Մարեկ Սուսկին։ «Քաղաքական գործիչը ցանկացել է մտնել բանտ, սակայն նրան թույլ չեն տվել»,- գրում է հարթակը։
Ակցիային մասնակցել է նաև ձերբակալված նախկին նախարարի կինը՝ Բարբարա Կամինսկայան։ Ցուցարարները կարգախոսներ են վանկարկել՝ պահանջելով ազատ արձակել Կամինսկուն։
Ոստիկանությունը չի միջամտել և որևէ ձերբակալություն չի իրականացրել։ Ակցիային մասնակցել է մի քանի տասնյակ մարդ։
