Սերբիայում իշխող կուսակցության կոալիցիան ընտրություններում առաջատարն է՝ ձայների 47,21 %-ով
Սերբիայի խորհրդարանական ընտրությունների քվեաթերթիկների 91,6 %-ի մշակումից հետո «Ալեքսանդր Վուչիչ-Սերբիան չպետք է կանգ առնի» կոալիցիան շարունակում է առաջատարը լինել՝ 47,21 % արդյունքով։ Այս մասին հաղորդել է Հանրապետական ընտրական հանձնաժողովը (ՀԸՀ)։
Ըստ հանձնաժողովի տվյալների՝ 8273 ընտրատեղամասերից 7584-ի քվեաթերթիկների մշակումից հետո կոալիցիան ստանում է 1 592 526 քվե կամ 47,21 %: Հաջորդը ընդդիմադիր «Սերբիան ընդդեմ բռնության» դաշինքն է՝ 22,9 % արդյունքով։ Երրորդ տեղն զբաղեցնում է «Իվիցա Դաչիչ-Սերբիայի վարչապետ» կոալիցիան՝ 6,67 % արդյունքով։
Հանրապետության նախագահ և Սերբիայի առաջադիմական կուսակցության անդամ Ալեքսանդր Վուչիչն ավելի վաղ հայտարարել էր, որ «Ալեքսանդր Վուչիչ – Սերբիան չպետք է կանգ առնի» կոալիցիան կզբաղեցնի խորհրդարանում տեղերի բացարձակ մեծամասնությունը և «կստանա ավելի քան 127 մանդատ (250-ից)»:
Քվեարկության ընթացքում Սերբիայի քաղաքացիները չորս տարով ընտրել են Ժողովրդական սկուպշչինայի (միապալատ խորհրդարան) 250 պատգամավորների, ինչպես նաև իրենց ներկայացուցիչներին 65 քաղաքներում և մունիցիպալիտետներում, ներառյալ` Բելգրադում և Վոևոդինայի Ինքնավար Երկրամասում։ Ընտրելու իրավունք ուներ ավելի քան 6,5 միլիոն մարդ։ Ընդհանուր առմամբ, ընտրողներին հասանելի են եղել 8 273 ընտրատեղամասեր Սերբիայում և 81 ընտրատեղամասեր 35 երկրներում:
Ընտրությունների արդյունքները ՀԸՀ-ն պետք է հրապարակի ընտրատեղամասերի փակումից հետո 96 ժամվա ընթացքում՝ դեկտեմբերի 21-ին։
