Սուեզի ջրանցքի ղեկավարությունը հայտնել է, որ ուշադիր հետևում է Կարմիր ծովում լարվածությանը
Եգիպտոսի Սուեզի ջրանցքի վարչության ղեկավար Ուսամա Ռաբեան կիրակի օրը հայտարարել է, որ իշխանությունները ուշադիր հետևում են Կարմիր ծովում առկա լարվածությանը, հաղորդում է Reuters-ը:
«Վարչակազմը ուշադիր հետևում է Կարմիր ծովում ներկայիս լարվածության ազդեցությանը ջրանցքում նավագնացության վրա», – ասվում է Ռաբեայի հայտարարության մեջ:
Միաժամանակ նա նշել է, որ ջրանցքով նավագնացությունը նորմալ է ընթանում։
Նոյեմբերի 19-ից 55 նավ փոխել է երթուղին Բարեհուսո հրվանդանով, մինչդեռ նույն ժամանակահատվածում ջրանցքը հատել է 2128 նավ, ասվում է հայտարարության մեջ:
Ավելի վաղ Եմենի հութիները զգուշացրել էին Կարմիր ծովում գտնվող բեռնատար նավերին խուսափել Իսրայելի ուղղությամբ շարժվելուց։ Նրանք ստանձնել են նորվեգական առևտրային լցանավին հրթիռով հարվածելու պատասխանատվությունը՝ ի նշան Գազայի հատվածի Իսրայելի ռմբակոծման դեմ բողոքի։
Միաժամանակ բրիտանական, ֆրանսիական և ամերիկյան ռազմանավերը հայտնել են Կարմիր ծովում Եմենի հութիների անօդաչու թռչող սարքերի ոչնչացման մասին։
