Հռոմի նոր պապի ընտրությունը նշանակվել է մարտի 12-ին
France-Presse լրատվական գործակալության փոխանցմամբ՝ Հռոմի նոր պապին ընտրելու ժողովը Վատիկանում բացվելու է մարտի 12-ին: Համապատասխան որոշումն ընդունվել է կաթոլիկ եկեղեցու կարդինալների երեկվա համընդհանուր ժողովում, որին մասնակցել են բոլոր 115 կարդինալ-ընտրողները:
Համայն աշխարհից Վատիկան ժամանած կարդինալների ժողովների շղթան մեկնարկել է մարտի 4-ին: Հռոմի նոր պապը պետք է կարողանա հավաքել կարդինալների քվեների առնվազն 2/3-ը՝ գումարած 1 քվե: Եթե դա տեղի է ունենում, ապա Սիքստինյան մատուռից բարձրանում է սպիտակ ծուխ, հակառակ դեպքում՝ սև ծուխ:
Բումեյքերներն ամենահավանական թեկնածու են համարում սևամորթ կարդինալ Փիթեր Թերքսոնին, ով ներկայացնում է Գանան և 2009 թվականից գլխավորում է Արդարության ու խաղաղության պապական խորհուրդը: Նրա հիմնական մրցակիցներն են իտալացի արքեպիսկոպոս Անջելո Սկոլան, իտալացի կարդինալ Տարչիզիո Բերտոնեն, կանադացի կարդինալ Մարկ Ուելլեն և Նիգերիան ներկայացնող կարդինալ Ֆրենսիս Արինզեն:
Հռոմի պապ Բենեդիկտոս XVI-ն իր կամավոր հեռանալու մտադրության մասին բարձրաձայնել էր այս տարվա փետրվարի 11-ին, իսկ փետրվարի 28-ին նա լքեց Վատիկանը: Վերջին անգամ նման բան գրանցվել էր 1415 թվականին, ինչը կապված է եղել կաթոլիկ եկեղեցու ներքին պառակտման հետ:
