Թուրքերը նախազգուշացրել են ԱՄՆ-ում և Եվրոպայում «այլատյացության և ռասիստական հարձակումների» մասին
Թուրքիայի իշխանությունները իրենց քաղաքացիներին զգուշացրել են «հնարավոր իսլամաֆոբ, այլատյաց և ռասիստական հարձակումների» մասին ԱՄՆ-ում և Եվրոպայում այն բանից հետո, երբ արևմտյան դաշնակիցներն իրենց քաղաքացիներին զգուշացրել են Թուրքիայում հնարավոր ահաբեկչությունների մասին, հաղորդում է Reuters լրատվական գործակալությունը։
Երկու առանձին ճամփորդական խորհուրդներում Թուրքիայի արտաքին գործերի նախարարությունը ԱՄՆ-ում և Եվրոպայում գտնվող իր քաղաքացիներին խորհուրդ է տվել «հանդարդորեն գործել հնարավոր այլատյաց և ռասիստական ոտնձգությունների և հարձակումների դեպքում» և «հեռու մնալ այն տարածքներից, որտեղ ցույցերը կարող են ակտիվանալ»:
Նախարարությունը նշել է, որ «հակաիսլամական և ռասիստական գործունեության» վերջին աճը արտացոլում է Եվրոպայում «կրոնական անհանդուրժողականության և ատելության վտանգավոր ասպեկտները»:
Անկարայում մի քանի դեսպանատներ, այդ թվում՝ ԱՄՆ-ի, Գերմանիայի, Ֆրանսիայի և Իտալիայի դեսպանատները, անվտանգության նախազգուշացումներ են արել Թուրքիայում գտնվող իրենց քաղաքացիներին:
Նախազգուշացումները հաջորդում են Եվրոպայում Ղուրանի այրմանը: Շվեդիայի ԱԳՆ-ն նաև խորհուրդ է տվել Թուրքիայում գտնվող իր քաղաքացիներին՝ խուսափել ամբոխներից և ցույցերից։
Անցյալ շաբաթ ծայրահեղ աջ քաղաքական գործիչըՍտոկհոլմում Թուրքիայի դեսպանատան մոտ տեղի ունեցած բողոքի ակցիայի ժամանակ այրել էր Ղուրանը, ինչը լարվածություն է առաջացրել Թուրքիայի և Շվեդիայի միջև: Նիդեռլանդներում և Դանիայում Ղուրանի այրման նմանատիպ գործողությունները նույնպես արժանացել են Անկարայի խիստ դատապարտմանը:
