Հայաստանում կանցկացվի «Ծրագրավորման ժամ» միջոցառումը
Դեկտեմբերի 11-ին ժամը 11-ին Հայ-հնդկական ՏՀՏ գերազանցության կենտրոնում կմեկնարկի «Ծրագրավորման ժամ / Hour of Code» խորագրով միջոցառումը, որի հիմնական նպատակն է երիտասարդների շրջանում հետաքրքրություն առաջացնել ՏՀՏ ոլորտի նկատմամբ։
Համաշխարհային այս նախաձեռնությանը միացել է նաև «Ձեռնարկությունների ինկուբատոր» հիմնադրամը՝ ԱՄՆ Միջազգային զարգացման գործակալության ֆինանսավորմամբ իրականացվող «Հայաստանում աշխատուժի զարգացման» ծրագրի ներքո` իր ծրագրերի շահառու երիտասարդների ակտիվ ներգրավմամբ, ովքեր դպրոցահասակ երեխաներին ներկայացնում են ծրագրավորման լեզուները, ցուցադրում ուսուցողական նյութեր և աջակցում ստացված գիտելիքի կիրառմամբ մշակել պարզ ծրագրեր։
Հայաստանում «Ծրագրավորման ժամ»-ն անցկացվում է Շիրակի մարզում՝ Գյումրու, Ազատանի, Արթիկի, Փանիկի, Մայիսյանի, Ոսկեհասկի, Ղարիբջանյանի, Մարմաշենի, Կապսի, Հացիկի, Հովունու, Լոռու մարզում՝ Վանաձորի, Դարպասի, Մարգահովիտի, Ստեփանավանի, Գյուլագարակի և Երևանում` Երևանի և հարակից մարզերի աշակերտների համար։ Նախաձեռնության կյանքի կոչմանը աջակցում են Գյումրու և Վանաձորի տեխնոլոգիական կենտրոնները, Մայքրոսոֆթ ինովացիոն կենտրոնը և Հայ-հնդկական ՏՀՏ գերազանցության կենտրոնը։
Այսպիսով՝ դեկտեմբերի 5-ից 11-ը իրականացվող «Ծրագրավորման ժամ» համաշխարհային նախաձեռնության շրջանակում Հայաստանի մի շարք բնակավայրերի շուրջ 900 դպրոցականներ հնարավորություն են ստացել մեկ ժամվա ընթացքում բացահայտել ծրագրավորման հետաքրքրական աշխարհը և մշակել պարզ ծրագրեր։
