Պարույր Հայրիկյանի և Անդրիաս Ղուկասյանի միջև առողջության մասին որևէ խոսք չի եղել
![](https://168.am/wp-content/uploads/2013/01/Paruyr-Hayrikyan-0.jpg)
ՀՀ նախագահի թեկնածու Պարույր Հայրիկյանը երեկ հայտարարեց, որ ընտրությունները հետաձգելու մասին ՍԴ ներկայացրած դիմումը հետ վերցնելու պատճառներից մեկը ՀՀ նախագահի մեկ այլ թեկնածուն՝ Անդրիաս Ղուկասյանն էր, ով, արդեն 24-րդ օրն է, ԳԱԱ շենքի դիմաց հացադուլ է անում:
«Ես գնացել էի Անդրիասի մոտ, ում հարցրել էի, թե արդյո՞ք վերջինս դուրս կգա հացադուլից, եթե միասնական թեկնածու ձևավորվի, ինչին ի պատասխան՝ Ղուկասյանն ասել էր, թե անգամ այդ դեպքում շարունակելու է հացադուլը: Նա մահվան շեմին է կանգնած, հայ մարդ է, կանգնած է մահվան շեմին: Ես ոչ միայն ընտրություններն եմ հետաձգում, այլև իմ նախասիրությունների պատճառով նպաստում եմ մի հայ մարդու լրացուցիչ վտանգին: Ստացվում էր, որ ընտրությունների հետաձգմամբ՝ ես նաև զոհասեղանին եմ հանձնելու Անդրիասին, որովհետև նա կմահանար»,- ասել էր Պարույր Հայրիկյանը:
168.am-ն Անդրիաս Ղուկասյանի շտաբի պետ Արմեն Գրիգորյանից հետաքրքրվեց, թե ինչպե՞ս է վերաբերվում թեկնածուն Պ. Հայրիկյանի վերոգրյալ հայտարարությանը, ինչին ի պատասխան՝ նա ասաց. «Միանշանակ ասեմ, որ Անդրիասը պատրաստ էր շարունակել իր պայքարը՝ նույնիսկ, եթե ընտրությունները շարունակվեն: Հայրիկյանը մինչ այդ եկել էր ու նամակ էր հանձնել միասնական թեկնածուի մասին, բայց առողջության մասին որևէ բան չէր ասել: Եթե դա էր իր նպատակը՝ կարող էր Ղուկասյանի հետ քննարկել այդ հարցը: Բայց նա եկավ միասնական թեկնածուի հարցով ու որևէ խոսակցություն Անդրիաս Ղուկասյանի առողջության մասին չեղավ»: