Մարտունու «Ավետյաց» պարային համույթը վերադարձել է երկու գլխավոր մրցանակներով
Գեղարքունիքի մարզի Մարտունի համայնքի «Ավետյաց» պարային համույթը երկու գլխավոր մրցանակներով է վերադարձել նոյեմբերի վերջերին Երեւանում կազմակերպված մրցույթ-փառատոներից։
Ինչպես «Արմենպրես»-ին տեղեկացրին Մարտունու համայնքապետարանի աշխատակազմից, առաջին մրցույթ-փառատոնին Մարտունու պարային համույթը մասնակցել է Գաբրիել Սունդուկյանի անվան ազգային ակադեմիական թատրոնի շենքում եւ յոթ անվանակարգերում գրավել առաջին պատվավոր տեղերը։ Համույթի պարող Գարիկ Իսրայելյանը արժանացել է փառատոնի «լավագույն պարող» անվանակարգի հատուկ մրցանակին եւ պարգեւատրվել է գավաթով։
Այնուհետ «Ավետյաց» պարային համույթը նաեւ մասնակցել է «Ազգային պարարվեստի միության» կողմից կազմակերպված «Պարատուն -2022» փառատոնին, որը նվիրված էր Սուրեն Գյանջումյանի 90 ամյակին։ Լավագույն մասնակցության համար համույթը պարգեւատրվել է հուշամեդալով։
Իսկ նոյեմբերի 29-ին Մարտունի քաղաքի մշակույթի պալատում տեղի է ունեցել «Ավետյաց» պարային համույթի վաստակած մրցանակների հանձնման արարողակարգը։ Համույթն ավանդական «Քոչարի» պարով ողջունել է Մարտունու համայնքապետարանի աշխատակիցներին եւ հյուրերին, ապա տեղի է ունեցել պատվոգրերի եւ հուշամեդալների հանձնումը։ «Ավետյաց» համույթի պարուսույց Արմինե Մովսիսյանը եւ գեղարվեստական ղեկավար Արթուր Սարգսյանը մանրամասներ են ներկայացրել իրենց ձեռքբերումների վերաբերյալ։
Խոսրով Խլղաթյան
