Հայաստանում օգտատերերի մոբայլ սարքերի վրա վնասաբեր ծրագրերի գրոհները թուլացել են
Անցած տարին բնութագրվեց Հարավային Կովկասի երկրների օգտատերերի վրա մոբայլ վնասաբեր ծրագրերի գրոհների թուլացմամբ, ինչը համահունչ է համաշխարհային միտումներին։ Այդ մասին են վկայում «Կասպերսկի» ընկերության տվյալները, որոնց համաձայն, 2021-ին Հայաստանում վնասաբեր ծրագրերի գրոհների են ենթարկվել մոբայլ օգտատերերի 1,58%-ն այն դեպքում, երբ նման օգտատերերի բաժինը Վրաստանում կազմել է 0,84%, իսկ Ադրբեջանում՝ 3,76%: 2020-ին Հայաստանում մոբայլ վնասաբեր ծրագրերի գրոհների բախվել է օգտատերերի 2,80%-ը, Վրաստանում այդ ծրագրերը գրոհել են օգտատերերի 2,25%-ին, իսկ Ադրբեջանում՝ 5,19%-ին:
Ընդ որում, եթե անցյալ տարի մոբայլ բանկային տրոյացիները Հայաստանում գրոհել են օգտատերերի 0,03%-ին, Վրաստանում՝ 0,02%-ին, իսկ Ադրբեջանում՝ 0,04%-ին, ապա 2020-ին այդ ցուցանիշներն ըստ երկրների կազմել են, համապատասխանաբար, 0,05, 0,09 և 0,06%:
Ինչ վերաբերում է մոբայլ շորթող տրոյացիներին, ապա 2021-ին դրանց գրոհները նույնպես թուլացել են նախորդ տարվա համեմատ. այդ վնասաբեր ծրագրերի գրոհների ենթարկվածների մասնաբաժինը Հայաստանում նվազել է 0,03-ից մինչև 0,02%, Վրաստանում՝ 0,02-ից մինչև 0,01%, Ադրբեջանում՝ 0,04-ից մինչև 0,02%:
«2021-ին մենք մոբայլ օգտատերերի վրա գրոհների թվի նվազման միտում ենք նկատել։ Սակայն ուրախանալը վաղ է. գրոհներն ավելի ճարտարամիտ են դառնում ինչպես վնասաբեր ԾԱ-ի ֆունկցիոնալության, այնպես էլ օգտագործվող վեկտորների ընտրության հարցում։ Փորձագետները շարունակում էին վնասաբեր ԾԱ գտնել Google Play-ում տեղադրված հավելվածներում, չնայած հարթակ սպառնալիքների ներթափանցման դեմ Google-ի պայքարին: 2021-ին հատկապես աչքի են ընկել Joker տրյացին, որը օգտատիրոջ վրա վճարովի բաժանորդագրություններ է ձևակերպում, և Facebook-ի հաշվեգրերից հաշվառման տվյալներ գողացող Facestealer տրոյացին, ինչպես նաև տարբեր բանկային տրոյացիների բեռնիչները»,- նշում են ընկերության փորձագետները:
Մոբայլ սարքերի վարակումից պաշտպանվելու համար նրանք օգտատերերին խորհուրդ են տալիս հավելվածներ ներբեռնել միայն վստահելի աղբյուրներից և սարքերի կարգավորումներում անջատել կողմնակի աղբյուրներից ծրագրեր տեղադրելու հնարավորությունը։ Հարկ է նաև ժամանակին թարմացնել համակարգը և կարևոր հավելվածները։ Անվտանգության շատ խնդիրներ լուծվում են դրանց ամենավերջին տարբերակների տեղադրմամբ։ Անհրաժեշտ է նաև ուշադիր լինել SMS-ի, էլեկտրոնային փոստի, մեսենջերների և սոցիալական ցանցերի հաղորդագրությունների նկատմամբ և չանցնել նաև բրաուզերի (դիտարկիչ) չստուգված հղումներով՝ ֆիշինգային կայքերում չհայտնվելու համար։ Անհրաժեշտ է մոբայլ սարքում տեղադրել արդյունավետ հակավիրուս։
