«Ժողովրդի կամքի վրա բռնացողներին հերթով մտցնելու ենք ծակերը, պատերով կտանք, ասֆալտներին են պառկելու». Նիկոլ Փաշինյան
Արարատի մարզի Ավշար համայնքում կայացած քարոզարշավին Նիկոլ Փաշինյանը հայտարարել է, որ ընտրական «տասովշիկների» նկատմամբ պայքարը շարունակվում է, և, որ հերթական ձերբակալություններն են տեղի ունեցել Երևանի Մալաթիա-Սեբաստիա համայնքում:
Նա սպառնացել է բոլոր ընտրակաշառատուներին, ընտրակեղծարարներին, որոնք կփորձեն ժողովրդի կամքի վրա բռնանալ, հերթով «մտցնել ծակերը»՝ ընտրություններից առաջ և հետո։
«Եվ որևէ մեկը չփորձի թպրտալ, պատերով կտանք, ասֆալտներին են պառկելու, այդ թվում՝ Ավշարի այս հրապարակի ասֆալտներում անձամբ պառկեցնելու եմ բոլոր նրանց, ովքեր փորձում են ժողովրդի կամքի վրա բռնանալ։ Թող պառկել-վեր կենալ սովորեն, որ հետո հեշտ լինի,- հայտարարեց Փաշինյանը և շարունակեց,- Ես անձամբ զբաղվելու եմ բոլոր նրանցով, ովքեր փորերը «քսելով» ասֆալտին, փորձում են ՀՀ քաղաքացիների ընտրական կամքին բռնանալ և ապօրինի ազդեցություն գործել: Լինեն ՏԻՄ-երում, մասնավոր հիմնարկներում, ովքեր քաղաքացիների կամարտահայտման նկատմամբ փորձում են ապօրինի ներգործություն ցուցաբերել, բոլոր նրանցով պողպատե մանդատով ես ինքս զբաղվելու եմ հատ-հատ: Եվ հետո որևէ մեկը թող չասի, թե չենք զգուշացրել»։
Նա ցուցադրելով պողպատե մանդատը խորհրդանշող մուրճը՝ նշեց, թե դրա չափը կախված է ժողովրդի տված տոկոսներից։
«Ինչքան շատ տոկոս տաք, այնքան «չագուչը» կմեծանա։ Ուրեմն՝ ինչքան ուզում եք՝ «կվալդը» ուժեղ լինի, բարձր «հելնի», ուժեղ իջնի, այդքան շատ տոկոս տվեք»,- եզրափակեց Փաշինյանը:
