«Ազարը երբեք չի եղել պրոֆեսիոնալ»․ Դաֆ
«Չելսիի» նախկին կիսապաշտպան Դամիեն Դաֆը խոսել է Մադրիդի «Ռեալի» կիսապաշտպան Էդեն Ազարի մասին, ով նախկինում խաղացել է լոնդոնցիների կազմում:
«Ազարը 30 տարեկան է, կտրուկություն չունի, նա այլևս այդքան արագ դրիբլեր չէ: Բոլորս գիտենք, որ 30-ամյակից հետո սկսվում է խաղացողների անկումը:
Նա երբեք բարձր մակարդակի պրոֆեսիոնալ չէր, երբեք չի ունեցել այն ցանկությունը, ինչ ունեն Մեսսին և Ռոնալդուն: Եթե նա ունենար, ապա, ինչպես ինձ է թվում, մենք նրան հավասար կդնեինք այս երկու խաղացողների հետ:
Ազարը Մադրիդի «Ռեալում» առաջին մրցաշրջանում հայտնվել էր ավելորդ քաշով, չնայած նրա համար վճարվեց 160 միլիոն եվրո, նա ուներ «գալակտիկայի» կարգավիճակ։
Դուք կարող եք անհանգստանալ նրա համար, քանի որ նա 11 վնասվածք է ստացել և հազիվ խաղացել է երկու տարի: 11 վնասվածքներից հետո վերադառնալու համար հարկավոր է պատրաստ լինել, պետք է լինել իսկական մասնագետ:
Կարելի է պնդել, որ նա իր ամբողջ կարիերայի ընթացքում պայքարում էր ավելորդ քաշի դեմ: Երբ Մադրիդի «Ռեալը» ձեզ հետ կնքում է 160 միլիոնի պայմանագիր, դուք պետք է հասնեք ձեր կյանքի լավագույն մարզավիճակին: Իսկ նա եկավ ավելորդ քաշով, քանի որ արձակուրդ էր ունեցել:
Ես ատում եմ անհատական խաղացողներին կոշտ քննադատելը, բայց Ազարն ինքն այնպիսի իրավիճակ ստեղծեց, երբ բոլոր քննադատություններն ուղղված էին նրան»,- ասել է Դաֆը RTE-ին:
2019 թվականի ամռանը «Ռեալին» միանալուց ի վեր, բելգիացին ակումբի հետ անցկացրել է 38 խաղ՝ դառնալով չորս գոլի և 7 գոլային փոխանցման հեղինակ:
Սիրարփի Աղաբաբյան
