Նախքան այդպիսի հայտարարություններ անելը Բելառուսը պետք է համաձայնության գար ՌԴ-ի և Հայաստանի հետ. Журналистская правда-ն` Լուկաշենկոյի` Բաքու կատարած այցի մասին
Բելառուսի նախագահ Ալեքսանդր Լուկաշենկոն իր ադրբեջանցի գործընկեր Իլհամ Ալիևի հետ բանակցություններից հետո ասել է, որ բելառուսները հուսալի ընկերներ են Ադրբեջանի համար:
«Բելառուսը չի կարողանա սպառել արտադրված պատվաստանյութերի ամբողջ ծավալը, ուստի նրանք պատրաստ են դրանք արտահանել, այդ թվում՝ Ադրբեջան: Սա ընդունվել է ոչ միայն դրականորեն, այլև որոշակի հույսով»,- մանրամասնել է նա:
«Ժուռնալիստսկայա պռավդա»-ն Բելառուսի նախագահի իրական մտադրությունների մասին զրուցել է Ռուսաստանի նախագահին կից ազգամիջյան հարաբերությունների խորհրդի անդամ Բոգդան Բեզպալկոյի հետ:
«Պետք է հաշվի առնել այն փաստը, որ Ալեքսանդր Գրիգորևիչը հաճախ անում է հայտարարություններ, որոնք հետո չի իրականացնում: Տարօրինակ է Ադրբեջանին խոստանալ Բելառուսից ռուսական պատվաստանյութերի մատակարարում, այն դեպքում, երբ Ռուսաստանը սահմանակից է Ադրբեջանին և կարող է նրան պատվաստանյութեր (ոչ միայն «Սպուտնիկ V») մատակարարել ավելի կարճ ժամկետներում՝ ընդունելի որակով: Ես այնքան էլ լավ չեմ հասկանում Ալեքսանդր Լուկաշենկոյի տրամաբանությունը: Բելառուսի ամբողջ բնակչությունն արդեն պատվաստվա՞ծ է: Պատվաստանյութերի ստեղծման արտադրական կարողությունների ապահովումը նախատեսված է հատուկ Բելառուսի բնակչության համար: Չեմ կարծում, որ մեր մասնագետները, որոնք այնտեղ ծրագրել են «Սպուտնիկ V»-ի արտադրությունը, տասնյակ անգամներ ավելի շատ պատվաստանյութ են արտադրում, քան պահանջվում է:
Նման հայտարարությունը մի տեսակ բարեկամության նշան է, նույնիսկ շողոքորթություն Ալեքսանդր Գրիգորևիչի կողմից: Միանգամայն պարզ չէ, թե ինչու է Ադրբեջանի հետ այդպիսի ակտիվ փոխգործակցություն սկսվել` հատկապես հաշվի առնելով այն փաստը, որ Ադրբեջանն այժմ հակամարտության մեջ է Հայաստանի հետ, որը Եվրասիական տնտեսական միության անդամ է: Այս միության անդամ է նաև Բելառուսի Հանրապետությունը, ինչը ենթադրում է, որ Երևանն ու Մինսկը դե ֆակտո դաշնակիցներ են: Բոլորի հետ բարենպաստ հարաբերություններ ունենալը կարևոր է, բայց այս պարագայում արժեր համաձայնության գալ Ռուսաստանի և Հայաստանի հետ՝ նախքան այդպիսի հայտարարություններ անելը:
Հավանաբար, սա Ռուսաստանի հետ ածխաջրածինների շուրջ հակամարտության հաջորդ փուլին նախաբանն է: Որքան գիտեմ, ներկայում քննարկվում է Ռուսաստանի Դաշնության և Բելառուսի կողմից մի շարք ճանապարհային քարտեզներ ստորագրելու հնարավորությունը, այդ թվում՝ ածխաջրածինների միասնական շուկայում:
Ալեքսանդր Գրիգորևիչը մեկնել է Ադրբեջան՝ Ռուսաստանի վրա ճնշում գործադրելու նպատակով: Իմաստն այն է, որ եթե Ռուսաստանի Դաշնությունն իր նավթը անվճար չտրամադրի, ապա Լուկաշենկոն կսկսի այն գնել Ադրբեջանից: Սա, ամենայն հավանականությամբ, Բելառուսի նախագահի «բարի ժեստի» էությունն է»:
