Սերժ Սարգսյանը մեկնելու է Լիբանան
Նախագահ Սերժ Սարգսյանը նոյեմբերի 26-28-ը պաշտոնական այցով կմեկնի Լիբանան, որտեղ նա մի շարք հանդիպումներ կունենա Լիբանանի բարձրագույն ղեկավարության՝ երկրի նախագահ Միշել Սուլեյմանի, Ազգային ժողովի նախագահ Նաբիհ Բերրիի, ընդլայնված հանդիպում՝ երկրի խորհրդարանականների, վարչապետ Նաջիբ Միկաթիի հետ: Այս մասին տեղեկացնում են ՀՀ նախագահի գրասենյակից:
Հայաստանի նախագահը կհանդիպի նաև լիբանանահայ համայնքի ներկայացուցիչներին:
Այցի շրջանակներում Սերժ Սարգսյանը կայցելի Անթիլիաս, հանդիպում կունենա Մեծի Տանն Կիլիկիո Արամ առաջին կաթողիկոսի հետ:
ՀՀ նախագահ Սերժ Սարգսյանը կայցելի Հայկազյան համալսարան, որտեղ կհանդիպի Լիբանանի չորս առաջատար համալսարանների պրոֆեսորադասախոսական անձնակազմի, միջազգայանագետ ուսանողների հետ:
Լիբանանում Սերժ Սարգսյանը հանդիպում կունենա նաև Մերձավոր Արևելքի Հայ ավետարանական եկեղեցիների նախագահ Մկրտիչ Կարագյոզյանի հետ, կայցելի Զմմառ, հանդիպում կունենա Տանն Կիլիկիո Կաթողիկե Հայոց կաթողիկոս, պատրիարք Ներսես Պետրոս 19-րդի հետ, կմասնակցի «Ուրբաթագրքի» տպագրության 500-ամյակի առիթով մշակութային կենտրոնի ևւ Մատենադարանի նորոգված հարկաբաժնի բացմանը, այնուհետ կայցելի ձեռագրերի և հնատիպ գրքերի ցուցահանդես:
Նախագահի պաշտոնական այցի ընթացքում նախատեսված է նաև տարբեր ոլորտներում Հայաստանի և Լիբանանի միջև համագործակցության ամրապնդմանն ուղղված փաստաթղթերի ստորագրման արարողություն:
