Վազգեն Սաֆարյանը արտոնություններ է ուզում փոքր ու միջին բիզնեսի համար
Հայրենական ապրանք արտադրողների միության նախագահ Վազգեն Սաֆարյանն այսօր ասել է, որ կառավարությանն առաջարկել են «Ավելացված արժեքի հարկի մասին» ՀՀ օրենքում փոփոխություններ մտցնել: Այս մասին գրում է Մեդիամաքսը։
«ՀՀ կառավարության հետ քննարկել ենք ԱԱՀ մասին օրենքի 6.1 հոդվածով ներդրումային ծրագրի շրջանակներում 300 մլն դրամ եւ ավելի արժեքով ներմուծվող ապրանքների վրայից ԱԱՀ ժամկետը 3 տարով հետաձգելու հնարավորություն ստեղծել, այդ շեմն իջեցնել փոքր ու միջին բիզնեսի ոլորտում աշխատողների համար»,- ասել է Վազգեն Սաֆարյանը:
Կառավարությանն ուղղված առաջարկների թվում են նաեւ արդյունաբերական քաղաքականության ռազմավարության 2013թ. բյուջեում արտահանման ոլորտի զարգացման համար նախատեսված 300 մլն դրամը լրացնել նաեւ մասնավոր միջոցներով եւ ստեղծել արդյունաբերության զարգացման ֆոնդ, որը կծառայի պետություն-մասնավոր գործընկերության գործառույթների զարգացմանը:
Վազգեն Սաֆարյանի փոխանցմամբ, ՀՀ կառավարութան հետ խոսվել է նաեւ բանկային տոկոսադրույքների մասին, որոնք պետք է խրախուսեն ավանդադրումը եւ զսպեն կապտալի արտահոսքը: «Հարկային բազան ընդլայնելու համար խնդիր է դրվել վերանայել հարկային տոկոսադրույքները, իջեցնել դրանք, որպեսզի մեծանա հարկ վճարողների թիվը»,- նշել է նա:
Հայրենական ապրանք արտադրողների միության նախագահը հույս է հայտնել, որ նշված առաջարկություններն արձագանք կստանան օրենսդրական դաշտում։
