Ադրբեջանը պետք է պատասխանի երկխոսությանը վերադառնալու հայկական կողմի նախաձեռնությանը. Սիրիայի ԱԳՆ
Սիրիան զգուշացնում է Հայաստանի և Ադրբեջանի միջեւ Լեռնային Ղարաբաղի շուրջ հակամարտությանը Թուրքիայի միջամտության վտանգավոր հետեւանքների մասին: Ինչպես տեղեկացնում է SANA գործակալությանը, այս մասին նշված է Սիրիայի ԱԳՆ-ի հայտարարության մեջ:
«Թուրքիան նպատակ է հետապնդում էլ ավելի բորբոքել Լեռնային Ղարաբաղի հակամարտությունը: Անկարայի գործողություններն ամենուր հանգեցնում են լարվածության աճին և կրոնական թշնամանքի սրմանը», – ասված է հաղորդագրության մեջ:
Սիրիայի ԱԳՆ-ն կոչ է անում Երեւանին եւ Բաքվին միջոցներ ձեռնարկել ռազմական էսկալացիայի նվազեցման եւ տարաձայնությունները խաղաղ միջոցներով կարգավորելու ուղղությամբ:
«Ադրբեջանի կառավարությունը պետք է զգոնություն ցուցաբերի թուրքական ծուղակում չհայտնվելու եւ հակամարտությունը զսպելու, եւ պատասխանի երկխոսությանը վերադառնալու հայկական կողմի նախաձեռնություններին», – ընդգծում է Սիրիայի ԱԳՆ-ն:
