Դուք, որ պատրաստ եք քծնել և ծառայել ցանկացած մարդու, միայն թե նա լինի իշխանության կրող, գիտե՞ք՝ ինչ ասել է սկզբունք և բարոյականություն․ Տարոն Սիմոնյան

Քամիները շատ են փչելու և տարբեր կողմից, բայց էլի իմ նշած մարդիկ շարունակելու են մարտնչել հանուն իրավական պետության և ուժեղ Հայաստանի, իսկ դուք շարունակելու եք վիրավորել նրանց ու փառաբանել օրվա իշխանություններին։ Այս մասին իր ֆեյսբուքյան էջում գրել է ՀՀ ԱԺ «Լուսավոր Հայաստան» խմբակցության պատգամավոր Տարոն Սիմոնյանն՝ անդրադառնալով համացանցում մեծ թափ հավաքող ատելության խոսքի քարոզին։

Նա մասնավորապես գրել է․

«Դուք, որ հաճույքով վիրավորում եք մարդու, ում չեք ճանաչում, չգիտեք՝ ինչ ճանապարհ է անցել, ինչ խոչընդոտներ է հաղթահարել և հանուն ինչ գաղափարի է դեռ մնում աննկուն,

Դուք, որ պատրաստ եք քծնել և ծառայել ցանկացած մարդու, միայն թե նա լինի իշխանության կրող,

Եվ դուք, որ ձեր օրինակով ամեն գնով նպաստում եք մարդկանց ու հասարակության բարոյական դեգրադացմանը։ Արդյոք գիտե՞ք՝ ինչ ասել է սկզբունք և բարոյականություն։ Իհարկե, ոչ։

Որովհետև, երբ 2008թ֊ի հայտնի դեպքերի ժամանակ մարդիկ համատեղ պայքարում, ապա իրենց տներում պատսպարում էին ցույցերում ծեծված ու հազիվ մազապուրծ մարդկանց՝ անտեսելով քրեական հետապնդումը, դուք կրկին վիրավորում էիք այդ մարդկանց և փառաբանում օրվա իշխանություններին։

Երբ համալսարաններում իշխանությունները տարածում էին սեփական ձեռքերը կուսակցականացման միջոցով, իսկ նույն մարդիկ, ուսանող տղաներն ու աղջիկները, իրենց կարիերայի վրա խաչ քաշելով, պայաքարում էին դրա դեմ, դուք կրկին վիրավորում էիք այդ մարդկանց և փառաբանում օրվա իշխանություններին։

Երբ այդ մարդիկ, անտեսելով իշխանությունների առաջարկություններն ու հետապնդումները, չէին շեղվում սեփական սկզբունքներից և իրենք իրենց քրտինքով վաստակում էին քիչ, բայց սեփական աշխատանքի արդյունքը, դուք, օրվա իշխանությանը մատուցած տարաբնույթ ծառայությունների արդյունքում մեծացնում էիք սեփական ստամոքսը կամ մարմնի այլ մասերը և կրկին վիրավորում այդ մարդկանց, փառաբանում օրվա իշխանություններին։

Ամեն դեպքում, քամիները շատ են փչելու և տարբեր կողմից, բայց էլի իմ նշած մարդիկ շարունակելու են մարտնչել հանուն իրավական պետության և ուժեղ Հայաստանի, իսկ դուք շարունակելու եք վիրավորել նրանց ու փառաբանել օրվա իշխանություններին։

Բայց պետությունը կառուցվելու է սկզբունք և բարոյականություն ունեցող մարդկանց ամենօրյա պայքարի արդյունքում… »

Ավելի վաղ տեղեկացրել էինք, որ Իրավապաշտպան «Իրավական ուղի» ՀԿ համահիմնադիր Ռուբեն Մելիքյանը «Ֆեյսբուքի» իր էջում գրառում է կատարել՝ նշելով, որ բազմաթիվ ֆեյքեր, այդ թվում՝ հանրային խորհրդի նախագահը, տարածում են դատավոր Արսեն Նիկողոսյանի լուսանկարները իր և ԼՀԿ պատգամավոր Տարոն Սիմոնյանի հետ (լուսանկարներից մեկում ինքը մանկահասակ տղայի հետ է)՝ պահանջելով Ն.Փաշինյանից պարզել, թե ինչ եմ է արել ՀՀ արդարադատության փոխնախարարի և Արդարադատության ակադեմիայի ռեկտորի պաշտոններում և ակնարկելով իր կապը դատավոր Նիկողոսյանի հետ։