«Դժվար ու պատասխանատու գործի նվիրյալներ եք դուք». Արայիկ Հարությունյանը շնորհավորական ուղերձ է հղել Ուսուցչի օրվա կապակցությամբ
Կրթության, գիտության, մշակույթի եւ սպորտի նախարար Արայիկ Հարությունյանը շնորհավորական ուղերձ է հղել Ուսուցչի օրվա կապակցությամբ։ Ուղերձում ասվում է.
«Սիրելի՛ ուսուցիչներ,
Շնորհավորում եմ ձեզ մասնագիտական տոնի՝ «Ուսուցչի օրվա» կապակցությամբ:
Դժվար ու պատասխանատու գործի նվիրյալներ եք դուք, եւ այս գեղեցիկ տոնը լավագույն առիթն է ձեզ գնահատանքի, երախտագիտության եւ բարեմաղթանքի խոսքեր հղելու:
Ձեր ձեռքերում է արժանապատիվ եւ իրավատեր քաղաքացի կրթելու կարեւոր առաքելությունը։ Ուսուցիչն այն մարդն է, ով սովորեցնում է չվհատվել դժվարություններից, երազանք կառուցել եւ գնալ դրա ետեւից, հավատալ ու հաղթել:
Վստահ եմ, որ սերունդներ կրթելու պատասխանատու գործը դուք կատարում եք առանձնակի սիրով ու նվիրումով: Գիտելիքները, որ տալիս եք ձեր սաներին, նրանցից յուրաքանչյուրի՝ որպես անհատի ձեւավորման ու կայացման հիմնաքարն է:
Կրկին շնորհավորելով մասնագիտական տոնի կապակցությամբ՝ ցանկանում եմ շնորհակալություն հայտնել ձեր կատարած գործի համար, մաղթել նորանոր հաջողություններ եւ ձեռքբերումներ ձեր կարեւոր աշխատանքում»:
