ՀՀ ԱԳՆ արձագանքը՝ ՌԴ փոխվարչապետի` ՀԱՊԿ-ում այլ երկրի կարգավիճակի վերաբերյալ հայտարարությանը
Հավաքական անվտանգության պայմանագրի կազմակերպությունում դիտորդի կամ գործընկեր երկրի կարգավիճակի հավակնող պետությունը պետք է ունենա դիվանագիտական հարաբերություններ ՀԱՊԿ անդամ բոլոր պետությունների հետ:
Սեպտեմբերի 13-ին լրագրողների հետ ճեպազրույցում այս մասին ասաց ԱԳՆ մամուլի խոսնակ Աննա Նաղդալյանը՝ արձագանքելով Ռուսաստանի Դաշնության փոխվարչապետ Յուրի Բորիսովի այն հայտարարությանը, թե Ռուսաստանը դեմ չէ Ադրբեջանին կարգավիճակ տրամադրելուն:
ԱԳՆ մամուլի խոսնակի խոսքով` նախարարությունը տեսել է այդ մեկնաբանությունը դիտորդի ու գործընկեր երկրի կարգավիճակի հետ կապված և կարող է ասել, որ կա ՀԱՊԿ կանոնադրություն, որտեղ հստակ ամրագրված են այն չափանիշները, որոնք պետք են և դիտորդին, և գործընկերոջը:
«Մասնավորապես, դիտորդի կարգավիճակի հավակնող պետությունը պետք է ունենա դիվանագիտական հարաբերություններ ՀԱՊԿ անդամ բոլոր պետությունների հետ: Ավելին, դիտորդի կարգավիճակի հավակնող պետությունը պետք է աջակցի միջազգային վեճերի և հակամարտությունների բացառապես խաղաղ կարգավորմանը: Իսկ ինչ վերաբերում է գործընկերոջ կարգավիճակին, ինչպես դիտորդի կարգավիճակի պարագայում, նա նույնպես պետք է ունենա դիվանագիտական հարաբերություններ ՀԱՊԿ անդամ բոլոր պետությունների հետ, չունենա հակամարտություններ այլ պետությունների կամ պետության հետ և չունենա տարածքային վեճեր հարևանների հետ»,- ընդգծեց Նաղդալյանը:
ԱԳՆ մամուլի խոսնակը շեշտեց, որ կա կանոնադրություն, կան հստակ ամրագրված դրույթներ և կա ՀԱՊԿ սկզբունքը, որ որոշումները կայացվում են կոնսենսուսի հիման վրա, ուստի առանց Հայաստանի համաձայնության ցանկացած մեկնաբանություն, կարծիք և դիրքորոշում կմնա միայն որպես այդպիսին:
